लक्ष्मी उप्रेती
मेचीनगर । पछिल्लो समय पारिश्रमिक भुक्तानीमा पान नम्बर अनिवार्य गरिएसँगै व्यक्तिगत स्थायी लेखा नम्बर (पान ) लिनेहरुको संख्या बढेको छ ।
![](https://pratidindaily.com/wp-content/uploads/2024/08/antarik-rajaso-karyalaya-jhapa-1_2_1317873011-1024x580.jpg)
गत आर्थिक वर्ष २०८०÷०८१ मा आन्तरिक राजस्व कार्यालय भद्रपुरबाट १४ हजार सात सय जनाले व्यक्तिगत पान नम्बर लिएका छन् ।
योसँगै यस कार्यालयबाट व्यक्तिगत स्थायी लेखा नम्बर (पान) लिनेको संख्या कुल ९६ हजार चार १५ पुगेको कार्यालयका प्रमुख कर अधिकृत कृष्णचन्द्र काफ्लेले जानकारी दिए ।आर्थिक वर्ष २०७९÷८० सम्ममा ८१ हजार सात सय १५ जनाले व्यक्तिगत स्थायी लेखा नम्बर ( पान) लिएका थिए । एक वर्षमा व्यक्तिगत पान लिने १४ हजार सातसय जना थपिएका छन् ।
प्रमुख कर अधिकृत काफ्लेले दिएको जानकारी अनुसार गत आर्थिक वर्ष २०८०÷०८१ मा आयकर, मूल्य अभिवृद्धि कर भ्याट, अन्तःशुल्क, अग्रिम कर कट्टी र व्यक्तिगत पान लिने १९ हजार छ सय ६२ जना नयाँ करदाता थपिएका छन् । आर्थिक वर्ष २०७९÷८० सम्म यो संख्या एकलाख ३८ हजार चार सय ३६ रहेको थियो । एक वर्षमा नयाँ थपिएका करदातासहित कुल एकलाख ५३ हजार नौसय ३९ जना करदाता रहेको कार्यालयको अभिलेखले देखाएको छ ।
गत आवमा अग्रिम कर कट्टी गर्ने २२ वटा निकायले मात्र स्थायी लेखा नम्बर लिएका छन् । यो संख्या आर्थिक वर्ष २०७९÷०८० सम्म तीन सय १४ रहेकोमा थपिएकासहित यो संख्या तीन सय ३६ रहेको कार्यालय प्रमुख काफ्लेले जानकारी दिए । उता, मूल्य अभिवृद्धि करतर्फ दर्ता हुने करदाताको संख्या छ हजार तीन सय ३३ पुगेको छ । एक वर्षमा चार सय ३६ जना मूल्य अभिवृद्धि करतर्फ दर्ता भएका छन् । आर्थिक वर्ष २०७९÷०८० सम्म यो संख्या पाच हजार आठसय ९७ रहेको कार्यालयले जनाएको छ । अन्तःशुल्कमा दर्ता हुने करदाताको संख्या भने तीन हजार नौसय २९ पुगेको छ । गत आर्थिक वर्षमा एकसय ९६ करदाता अन्तःशुल्कमा दर्ता भएका थिए । सवैभन्दा बढी आयकरतर्फ ४६ हजार नौसय २६ जना करदाता रहेका छन् । गत आर्थिक वर्ष २०८०÷०८१ मा थपिएका कुल दुई हजार दुईसय २८ र यस आर्थिक वर्ष अघिसम्मका कुल ४४ हजार छ सय ९८ सहित आन्तरिक राजस्व कार्यालय भद्रपुरमा आयकरतर्फ ४६ हजार नौसय २६ जना करदाता पुगेको बताइएको छ ।
आन्तरिक राजस्व कार्यालय भद्रपुरको कार्यक्षेत्रअन्तर्गत झापाको मेचीनगर, भद्रपुर, बिर्तामोड, कन्काई र अर्जुनधारा नगरपालिका र बाह्रदशी, बुद्धशान्ति, कचनकवल, झापा र हल्दीबारी गाउँपालिका रहेका छन् । कोशी प्रदेशका झापा, इलाम, पाँचथर र ताप्लेजुङगरी चारवटा जिल्लाका ठूला करदाताहरुलाई भद्रपुर कार्यालयले सेवा प्रवाह गर्ने गरेको छ ।
यद्यपि करदाताको सुविधाका लागि यसै कार्यालयको मातहतमा रहनेगरी प्रत्येक जिल्लामा करदाता सेवा कार्यालय रहेका छन् । करचुक्ता प्रमाणपत्र प्रदान गर्ने, विभिन्न प्रकारका कर संकलन गर्नेलगायतका काम सेवाकेन्द्रले गरेपनि ठूल्ठूला मुद्धा मामिला आए आन्तरिक राजस्व कार्यालय भद्रपुरले हेर्ने प्रमुख कर अधिकृत काफ्लेको भनाई छ ।
![](https://pratidindaily.com/wp-content/uploads/2024/08/6d3a9649-a439-48a1-968c-623aad3df61d-1024x428.jpg)