झापा , साउन २९ । झापाको बाह्रदशीमा मोटरसाइकलको ठक्करबाट एक पैदलयात्रीको मृत्यु भएको छ ।
![](https://pratidindaily.com/wp-content/uploads/2023/10/accident_bdxoZeA7Bv-1024x478.jpg)
मृत्यु हुनेमा बाह्रदशी गाउँपालिका– १ नयाँ बस्तीका ४२ वर्षीय च्याङवा तामाङ रहेको जिल्ला प्रहरी कार्यालय झापाले जनाएको छ । गएराति ९ बजे बाह्रदशी गाउँपालिका– २ जनता बजारस्थित भित्री सडकखण्डमा कुटीबाट राजगढतर्फ आउँदै गरेको मे ४ प ५१५६ नम्बरको मोटरसाइकलले पैदलयात्री तामाङलाई ठक्कर दिएको थियो । घाइते तामाङलाई उपचारका लागि बीएण्डसी अस्पताल बिर्तामोड पठाइएको थियो । उनको उपचारको क्रममा आज बिहान पौने १२ बजे अस्पतालमा मृत्यु भएको प्रहरीले जनाएको छ ।
मोटरसाइकलमा पछाडि सवार कचनकवल गाउँपालिका– १ का अन्दाजी १९ वर्षीय श्रवण राजवंशीसमेत घाइते भएका थिए । निधार र टाउकोमा चोट लागेका उनको सोही अस्पतालमा उपचार भइरहेको छ । प्रहरीले मोटरसाइकल चालक कचनकवल गाउँपालिका –१ पिण्डलबारीका १९ वर्षीय देवराज राजवंशीलाई नियन्त्रणमा लिएको छ ।