झापा, भदौ २ । अन द जव ट्रेनिङ (ओजेटी) मा आएका छात्रामाथि यौन दुर्ब्यवहार गरेको आरोपमा पक्राउ परेका पावरटेक कम्प्युटर बिर्तामोडका संचालक अलेक मेचे रिहा भएका छन् ।
![](https://pratidindaily.com/wp-content/uploads/2024/08/26910883_947354842105411_8970534078599850759_o-1-1024x630.jpg)
उनीसहित दुईजना पक्राउ परेका थिए । पावरटेक कम्प्युटरका सञ्चालक मेचे र सोही कम्प्युटर इन्स्टिच्युटका शिक्षक नारायण खनाललाई हिजो बेलुका प्रहरीले पक्राउ गरेको थियो । अनुसन्धानका लागि म्याद थप गर्न आज अदालत लगिएकोमा मेचेको हकमा अदालतले म्याद थप नगरेको र खनाललाई भने हिरासतमै राखेर अनुसन्धान गर्न आदेश दिएको इलाका प्रहरी कार्यालय बिर्तामोडका डीएसपी प्रकाश विष्टले बताए ।
बिर्तामोड नगरपालिका २ मा सञ्चालित एक विद्यालयमा कम्प्युटर इञ्जिनियरिङ विषय अध्ययनरत एक जना छात्रालाई यौन दुर्ब्यवहार गरेको आरोपमा प्रहरीले हिजो बेलुका मेचे र खनाललाई पक्राउ गरेको हो। कम्प्युटर इञ्जिनियरिङको ओजेटीका लागि आएका विद्यार्थीमाथि उनीहरुले बाल यौन दुरुपयोग गरेको उजुरीका आधारमा प्रहरीले पक्राउ गरेको थियो ।
मेचे र खनालले ओजेटीमा आएका विद्यार्थीहरुलाई विभिन्न स्थानमा घुमाउन लैजाने, आइफोन किनिदिनेजस्ता प्रलोभन देखाउने, संवेदनशील अंगमा छुने,सुम्सुम्याउने , व्याक टच गर्ने ,नदिए ओजेटीको प्रमाणपत्र नदिनेजस्ता धम्की देखाएपछि विद्यार्थीले अभिभावकलाई सुनाएका थिए । लगत्तै अभिभावकले विद्यालयका प्रधानाध्यापकलाई जानकारी गराएसंगै प्रहरीलाई खवर गरेका थिए । पक्राउ परेका उनीहरुविरुद्ध आइतवार बाल यौन दुरुपयोग मुद्धा दर्ता गरी अनुसन्धान अघि बढाइएको प्रहरी नायव उपरीक्षक विष्टले जानकारी दिए । विद्यालयका विद्यार्थीहरु ५० दिनको लागि ओजेटीमा पावरटेक कम्प्युटरमा सिक्न गएका थिए ।