कुमरखोद, कात्तिक ११ । झापा गाउँपालिका वडा नं.२ कुवाडी गाउँमा निलगाईको बच्चा फेला परेको छ ।
एक स्थानीयले माईखोलाको किनारमा उक्त निलगाईको बच्चा फेला पारेका हुन् ।
स्थानीय निरबहादुर अधिकारीका अनुसार हिजो आफ्नो गाईवस्तु माईखोलाको बगरबाट घर ल्याउने क्रममा गाईवस्तुसँगै निलगाईको बच्चा आएको हो । निलगाईको सो बच्चाको उमेर अन्दाजी १५–२० दिनको रहेको स्थानीयवासीले बताएका छन् । उक्त बच्चालाई अधिकारीले दुध खुवाइरहेका छन् । उनका अनुसार निलगाईको बच्चा फेला परेपछि हिजो नै स्थानीय जनप्रतिनिधि र प्रहरीलाई जानकारी गराइएको छ ।
इलाका प्रहरी कार्यालय कुमरखोदका प्रमुख दिपेन्द्र राईले जिल्ला प्रहरी कार्यालय झापा र डिभिजन वन कार्यालयलाई जानकारी गराइएको बताए ।
झापामा यसअघि पनि निलगाई देखा परेको थियो । करिव डेढ दशकअघि निलगाईले हान्दा बिर्तामोड ३ सैनिकमोडमा दुईजनाको मृत्यु भएको थियो भने दुईजना घाइते भएका थिए ।
