झापा,कात्तिक ३० । झापा कचनकवल–५ पाठामारी डाँगावारी निवासी मितु मियाको करिब एक विघा खेतको धानवालीमा आगजनी भएको छ ।
अज्ञात व्यक्तिले राति करिव १ बजे उनको धानमा आगजनी गरेका हुन् । आगलागी भद्रपुर नगरपालिकाबाट आएको वारुण यन्त्रले निभाएको थियो। राति सुतिरहेको बेला आगोको ठूलो मुस्लो देखेपछि बाहिर आएर हेर्दा आफूले दुई दिनअघि जम्मा गरेर राखेको धानको दुवै कुन्यूमा दनदनी आगो लागेको देखेपछि छिमेकीसंग गुहार मागेको पीडित मियाले बताए ।
घटनास्थल नेपाल भारत सीमानजिक रहेको छ भने सशस्त्र क्याम्पबाट मात्र १५० मिटर दुरीमा रहेको छ । आपराधिक मानसिकता बोकेका व्यक्तिले नियतवस सो घटना घटाएको मियाले बताए । गत वर्ष पनि पाठामारीमै करिव २ विघाको धानमा त्यसरी नै आगजनी गर्दा जलेर नष्ट भएको थियो ।
