अर्जुनधारा, मंसिर ३ । मेचीनगर नगरपालिका चौंथो खुदुनाबारी गोल्डकपको फाइनलमा प्रवेश गरेको छ ।
आज भएको अन्तिम सेमिफाइनल खेलमा भद्रपुर नगरपालिकालाई ६–१ गोलको फराकिलो अन्तरले पराजित गर्दै मेचीनगर उपाधिनजिक पुगेको हो ।
मेचीनगरलाई सहजै जित दिलाउन सनम भुजेलले ह्याट्रिक गरे । ३४ औं मिनेटमा पहिलो गोल गरेका भुजेलले ४० औं मिनेटमा दोस्रो र ६९ औं मिनेटमा ह्याट्रिक पूरा गरे ।
खेलमा मेचीनगरका लागि पहिलो गोल सरोज कार्कीले गरेका थिए । उनले खेलको ३० औं मिनेटमा गोल गर्दै टिमलाई सुरुवाती अग्रता दिलाए । त्यस्तै मेचीनगरका लागि लक्षु थापाले ५४ औं मिनेटमा थप एक गोल गरे । दोस्रो हाफको अतिरिक्त समयमा भद्रपुरका गोलरक्षक देव लिम्बूले फल्ड गरेपछि पाएको पेनाल्टीको अवसरलाई सदुपयोग गर्दै कप्तान खमिर गिल्सन कन्दङ्वाले थप एक गोल गर्दा मेचीनगर ६–१को फराकिलो अन्तरले विजयी बनेको हो ।
भद्रपुरका लागि कर्ण लिम्बूले दोस्रो हाफको अतिरिक्त समयमा सान्त्वना गोल फर्काएका थिए । पहिलो हाफको ३० मिनेटपछि दबाबमा परेको भद्रपुरका खेलाडीले अन्य स्कोर गर्न नसक्दा प्रतियोगितामा नमिठो पराजय भोग्यो ।
आजको खेलमा मेचीनगरका सनम भुजेल म्यान अफ दि म्याच चुनिए । उनले नगद ५ हजार र ट्रफी पाए । उनलाई कोशी प्रदेशका पूर्व मुख्यमन्त्री उद्धव थापा, प्रतियोगिताका संयोजक सिताराम भट्टराई, मेचीनगरका नगर प्रमुख गोपालचन्द्र बुढाथोकी, उपप्रमुख मिना पोखरेल उप्रेती, झापा जिल्ला खेलकुद विकास समितिका अध्यक्ष प्रशान्त भण्डारी, अर्जुनधारा नगर खेलकुद विकास समितिका अध्यक्ष सुरेन्द्र धिमाललगायतले पुरस्कार प्रदान गरे ।
आजको खेलको विजेताले चौंथो खुदुनाबारी गोल्डकपको उपाधिका लागि मंसिर ५ गते शिवसताक्षी नगरपालिकासंग फाइनलमा प्रतिस्पर्धा गर्ने छ । आइतबार भएको पहिलो सेमिफाइनल खेलमा बिर्तामोड नगरपालिकालाई २–१ गोल अन्तरले पराजित गर्दै शिवसताक्षीले फाइनलमा स्थान सुरक्षित गरेको हो ।
प्रतियोगिताको विजेताले नगद १ लाख ११ हजार २ सय ११ रुपैयाँ र उपविजेताले नगद ५५ हजार ६ सय ५५ रुपैयाँसहित ट्रफी तथा मेडल पुरस्कार पाउने छन् ।
प्रतियोगिताको बेस्ट स्कोरर, बेष्ट डिफेन्डर, बेष्ट कोच, बेष्ट फरवार्ड, बेष्ट गोलरक्षकले जनही ७ हजार रुपैयाँ पुरस्कार पाउने आयोजकले जनाएको छ ।गोल्डकपलाई अर्जुनधारा नगरपालिकाको १, २ र ३ नम्बर वडाले संयुक्त रुपमा आयोजना गरेका हुन् ।
