झापा, मंसिर ५ । इलामको माईजोगमाई–१ लप्सीबोटेमा ट्रयाक्टर दुर्घटनामा परी तीन जना घाइते भएका छन्। तीमध्ये एकजनाको अवस्था गम्भीर छ ।
आज दिउँसो १.३० बजे माईजोगमाई –१ लप्सीबोटेस्थित नयाँबजार–फिक्कल पक्की सडकखण्डमा नयाँबजारबाट गुप्तीतर्फ आउँदै गरेको प्र–१–०१–००१ त ९९५२ नं. को ट्रयाक्टर आफै अनियन्त्रित भई पछाडीको डाला पल्टिई दुर्घटना भएको हो । ट्रयाक्टरको डालामा सवार व्यक्तिहरु घाइते भएका हुन् । दुर्घटनामा माईजोगमाई –३ नाम्सालिङ बस्ने अन्दाजी ४० वर्षीय गिरिराज श्रेष्ठ (टाउको, दाहिने हातको पाता र हत्केलामा चोट, अवस्था मध्यम), सोही ठाउँ बस्ने अन्दाजी ३६ वर्षीय योगेन्द्र पाठक (टाउको र अनुहारमा सामान्य चोट, अवस्था सामान्य) र अन्दाजी ३० वर्षीय रबिन काफ्ले ( दाहिने हातमा चोट ,अवस्था सामान्य) घाइते भएका छन् ।
उनीहरुलाई उपचारको लागि फिक्कल अस्पताल फिक्कल पठाइएको छ । दुर्घटनापछि योगेन्द्र पाठक र रबिन काफ्ले उपचारपछि डिस्चार्ज भएका छन् । घाइतेमध्ये गंभीर घाइते गिरिराज श्रेष्ठलाई आफन्तले झापातर्फ ल्याउने तयारी गरिरहेको जिल्ला प्रहरी कार्यालय इलामका प्रहरी निरीक्षक रमेश राईले बताए ।
दुर्घटनापछि ट्रयाक्टर चालक माईजोगमाई –३ नाम्सालिङ बस्ने अन्दाजी १९ वर्षीय पेम्वा शेर्पालाई इलाका प्रहरी कार्यालय नयाँबजारले नियन्त्रणमा लिएको उनले जानकारी दिए ।
