झापा, मंसिर ६ । गएराति खोटाङको रावाबेसी गाउँपालिका वडा न. ४ मा आगलागी भएको छ ।
राति ८.१५ बजे रावाबेसी– ४ डुमेधारापानी बस्ने इन्द्रबहादुर भुजेलको ढुङ्गा माटोको गारोले बनेको जस्ताको छाना भएको दुईतले घरमा एक्कासि आगलागी भएको हो । आगलागीको जानकारी प्राप्त हुनासाथ प्रहरी चौकी डुम्रेधारापानीबाट खटिएको प्रहरी टोली र स्थानीयको सहयोगमा राति १०ः३० बजे आगो पूर्णरुपमा नियन्त्रणमा आएको थियो । आगलागीबाट भएको क्षतिको विवरण आउन बाँकी रहेको प्रहरीले जनाएको छ ।
यसैबीच आगो निभाउन जाने क्रममा बाटोमा लडेर प्रहरी चौकी डुम्रेधारापानी खोटाङ दरवन्दी भई जिल्ला प्रहरी कार्यालयमा कार्यरत प्रहरी सहायक हवल्दार कोषराज कोइराला घाइते भएका छन् । दाहिने खुट्टामा चोट लागेका कोइरालाको स्थानीय स्वास्थ्य चौकीमा उपचार भइरहेको छ ।
