झापा , मंसिर २८ । आज साँझ झापाको गौरीगञ्जमा आगलागी हुँदा ३ विगाह खेतको धानको कुन्यू जलेर नष्ट भएको छ ।
साँझ ६ बजेतिर गौरीगञ्ज गाउँपालिका वडा नम्बर ४ बारासुतीमा कदमगाछी बस्ने सहदेव भनिने श्रीदेव राजवंशीको ३ विगाह खेतको धानको कुन्यूमा अचानक आगलागी भएको हो । आगलागीबाट अन्दाजी ३ लाख मूल्यबराबरको क्षति भएको छ ।
प्रहरी चौकी खजुरगाछी र इलाका प्रहरी कार्यालय गौरीगञ्जबाट खटिएको प्रहरी टोली ,स्थानीयबासी र गौरादह नगरपालिकाको दमकलको सहयोगमा साँझ ६ः५० बजे आगो पूर्णरुपमा नियन्त्रणमा आएको प्रहरीले जनाएको छ ।
