झापा, पुष ३ । इलाका प्रहरी कार्यालय धरान सुनसरीमा कार्यरत प्रहरी नायव उपरीक्षक प्रकाश जवेगु कोशी प्रदेशकै सर्वोत्कृष्ट प्रहरी घोषित भएका छन् ।
प्रहरी नायव उपरीक्षक जवेगुले गरेको कामको उच्च मूल्याङ्कन गर्दै कोशी प्रदेश प्रहरी कार्यालय विराटनगरले उनलाई मंसिर महिनाको सर्वोत्कृष्ट प्रहरी घोषणा गरेको हो । विभागीय मूल्य–मान्यता, आदेश–निर्देशनको पालना गरी उच्च मनोबल र साहसका साथ आफ्नो कर्तव्य निर्वाह गर्ने क्रममा प्रहरी नायव उपरीक्षक जवेगुले धनकुटाबाट धरानतर्फ आउँदै गरेको बा १ झ ५१२७ र बा १ झ ४६०५ नम्बरको सरकारी नम्बर प्लेट लगाएको दुईवटा गाडीमा लागूऔषध गाँजाको ओसारपसार भइरहेको भन्ने गोप्य सूचनाको आधारमा गत मंसिर १८ गते साँझ ७ बजे धरान १३ अमरहाट त्रिवेणी चौकमा सवारीसाधनहरु चेकजाँच गर्ने क्रममा ४ राउण्ड गोली फायर गरी उक्त गाडीलाई नियन्त्रणमा लिई कानून बमोजिम तलासी लिँदा दुवै सवारीसाधनबाट कुल ६९० के.जी गाँजासहित चालकलाई पक्राउ गर्न सफल भएका थिए ।
त्यस्तै विभिन्न मुद्दाका ११ जना फरार प्रतिवादी पक्राउ गर्न जवेगु सफल भएका थिए । साथै भन्सार चोरी पैठारी गरी ल्याएको अन्दाजी मूल्य रु १७ लाख ३२ हजार ४३० रुपैयाँबराबरका सामानहरु बरामद गर्न सफल भएको प्रदेश प्रहरी कार्यालयले जनाएको छ ।
