झापा, पुष १० । सीमा अपराध नियन्त्रण गर्न झापाका स्थानीय सरकार र सशस्त्र प्रहरी बल, नेपालबिच सहकार्य गर्ने सहमति भएको छ ।
“सीमावासीसँग सशस्त्र प्रहरी” कार्यक्रमअन्तर्गत सीमासंग जोडिएका २३ वटा वडाका वडा अध्यक्ष तथा प्रतिनिधिहरुसंगको अन्तरक्रिया कार्यक्रममा सीमा सुरक्षा गरी सीमा अपराध नियन्त्रण गर्न स्थानीय सरकार र सशस्त्र प्रहरी बल, नेपालबिच समन्वय तथा सहकार्य गर्ने सहमति भएको हो ।
हिजो सशस्त्र प्रहरी बल नेपाल नं. २ गण हेक्वा झापामा सशस्त्र प्रहरी बल, नेपाल नं.२ गण हे. क्वा. झापाका गणपति सशस्त्र प्रहरी उपरीक्षक कविन्द्र राईको प्रमुख आतिथ्यमा भएको अन्तरक्रिया कार्यक्रममा सीमामा प्रत्यक्ष सरोकार राख्ने स्थानीयवासीहरुसँगको सुमधुर सम्पर्क, समन्वय र सहकार्यले सीमा सुरक्षाको जिम्मेवारीलाई प्रभावकारी रुपमा सम्पादन गरी संगठनले सीमा सुरक्षाको सवालमा राखेको लक्ष्यलाई पूरा गर्न सहज भएको निष्कर्ष निकालिएको सशस्त्र प्रहरी बल नेपाल नं. २ गण हे.क्वा. झापाका सूचना अधिकारी सशस्त्र प्रहरी नायव उपरीक्षक महेशराज बिष्टले जानकारी दिए ।
सीमावासीबाट प्राप्त सूचना, सहयोग र सीमावासीको प्रतिनिधिको रुपमा अन्तर्राष्ट्रिय सीमा जोडिएका स्थानीय तहका सीमावर्ती वडाका वडा अध्यक्षहरुको संयोजकत्वमा विभिन्न संघ संस्था, सुरक्षा निकाय र सरोकारवाला अन्य निकायहरुको सहभागितामा गठन भएका सीमा सहजीकरण समितिहरुवाट नियमित बैठक छलफल अन्तरक्रियामार्फत सीमा सुरक्षामा देखिएका समस्या तथा कमि कमजोरीहरुलाई सुधार गरी आगामी दिनमा सशस्त्र प्रहरी बलले अवलम्बन गर्नुपर्ने भावी नीति र कार्यक्रमका बारेमा समेत छलफल भएको सशस्त्र प्रहरी नायव उपरीक्षक बिष्टले जानकारी दिए ।
सीमा सुरक्षा कार्यलाई अझ प्रभावकारी बनाउने उद्देश्यअनुरुप सशस्त्र प्रहरी बल नेपालले अगाडी ल्याएको “सीमावासीसँग सशस्त्र प्रहरी” कार्यक्रमअन्तर्गत सीमा सुरक्षामा खटिएका बि.ओ.पि. प्रस्तावित सीमा सुरक्षा गुल्म र गणहरुले विविध कार्यक्रम र सचेतनामूलक कक्षाहरु संचालन गर्दै आइरहेका छन् ।
कार्यक्रममा सशस्त्र प्रहरी बल, नेपालप्रति स्थानीय जनताको अपेक्षा, सीमावर्ती अपराध र गैरकानूनी क्रियाकलाप नियन्त्रण गर्न समुदायको भूमिकाको पहिचान, सशस्त्र प्रहरी बल, नेपालले संचालन गर्ने Community outreach Program, स्थानीय सरकारको सहभागिता सहयोगका क्षेत्रहरु, सीमावर्ती इलाकाको जनताको कल्याणकारी कार्य सम्बन्धमा Border Area Development program (BADP) अन्तर्गत पूर्वाधार विकास, महत्वपूर्ण धार्मिक तथा ऐतिहासिक स्थलहरुको सरसफाई तथा सीमाबासी नागरिकहरुको जिविकोपार्जनमा टेवा पुर्याउने उद्देश्य अनुरुप सिपमुलक तालिम संचालन गर्ने जस्ता विविध बिषयहरुमा पनि छलफल भएको थियो ।
अन्तरक्रिया कार्यक्रममा जनप्रतिनिधिसंगै प्रस्तावित सीमा सुरक्षा गुल्मका गुल्मपतिहरु तथा बिओपीपतिहरु र अन्य सिनियर अधिकृतहरुको उपस्थिति रहेको थियो ।
