झापा, माघ १८ । भूतपूर्व सैनिकहरुको पुनर्वास भूमि बिर्तामोड १० सैनिक बजारको पहिचानलाई उजागर गर्न लगाइदै आएको सैनिक महोत्सवलाई निरन्तरता दिइने भएको छ ।

आगामी फागुन ७ देखि १७ गतेसम्म तेस्रो संस्करणको सैनिक महोत्सव आयोजना हुने भएको हो । बिर्तामोड नगरपालिकाको १० नं वडा कार्यालयको सहयोगमा जातीय भेषभूषासहितको तेस्रो ऐतिहासिक सैनिक महोत्सव गर्न लागिएको आज वडा कार्यालयमा आयोजित पत्रकार सम्मेलनमा जानकारी दिइयो ।

यसअघि २०७५ मा पहिलो सैनिक महोत्सव र त्यसको अर्को वर्ष २०७६ मा दोस्रो सैनिक महोत्सव आयोजना गरिएको थियो । त्यसपछि कोरोना संक्रमणका कारण रोकिएको सैनिक महोत्सवलाई यस वर्ष निरन्तरता दिन लागिएको वडाध्यक्ष दुर्योधन गुरुङले जानकारी दिए । उनले भूतपूर्व सैनिकहरुको थलो ,बहुसंख्यक जातजातिको बसोबासस्थल , खेलाडीको उर्वरभूमि , महाभारतकालीन पोखरी र विभिन्न मठमन्दिर भएको ठाउँ सैनिक बजारको चिनारीलाई उजागर गर्न महोत्सव आयोजना गरिएको जानकारी दिए । वडा कार्यालय उत्तरपट्टि रहेको खाली ठाउँमा महोत्सव लगाइने भएको हो ।

महोत्सव सफल पार्न सन्तोष गुरुङको अध्यक्षतामा १३ सदस्यीय मूल आयोजक कमिटी गठन गरिएको छ। त्यस्तै विभिन्न उपसमितिहरु प्नि गठन गरिएको मूल आयोजक कमिटीका सचिव खुवराई भट्टराईले जानकारी दिए । यातायात व्यवस्थापनतर्फ बिमल राई , अतिथि सत्कारतर्फ तारा आपागाँई,भेषभूषा झाँकी ब्यवस्थापनतर्फ साबित्रा राजवंशी,टेन्ट ब्यबस्थापन तथा गेट निर्माणतर्फ देवेन्द्र दर्नाल,जलपानतर्फ बिमनप्रसाद राई,प्रचारप्रसारतर्फ खड्गबहादुर गुरुङ,स्वयंसेवक परिचालनतर्फ भोलानाथ पाण्डेको संयोजकत्वमा उपसमितिहरु गठन गरिएको जानकारी दिइएको छ ।

महोत्सवका लागि वडा कार्यालयले चारलाख रुपैयाँ सहयोग गर्ने भएको छ । वडाध्यक्ष गुरुङको अध्यक्षतामा भएको पत्रकार सम्मेलनमा नेपाली कांग्रेस झापाका सचिव नबिन बिमली, ,समाजसेवी कृष्ण बिमली, ,राप्रपाका जिल्ला सदस्य जगत बस्नेत, मंगोल नेशनल अर्गनाइजेशनका केन्द्रीय सदस्य यामकुमार श्रेष्ठ, ,वेल्स मोडेल स्कूलका प्रिन्सिपल तारा प्रसाईलगायतले महोत्सव सफलताका लागि सामूहिक प्रतिवद्धता जनाएका छन् । त्यस अवसरमा बिर्तामोड–१० वडा सदस्य धनमाया श्रेष्ठ,पूर्व वडा सदस्य भक्तबहादुर राजवंशी,नेकपा एमालेका रिमानध्वज लोक्ताम, इन्जिनियर बिजय राईलगायतको उपस्थिति रहेको थियो । कार्यक्रमको संचालन बिर्तामोड–१० वडा सदस्य दिपिका सिवाले गरेकी थिइन् ।

२०२० सालमा तत्कालीन राजा महेन्द्रले इलाममा रहेका भूतपूर्व सैनिकका २ सय परिवारलाई त्यहाँ पुनर्वास गराएका थिए । पूर्वराजाको निर्देशनपछि भूतपूर्व सैनिकका परिवारले १६ सय बिगाह वनक्षेत्र आवाद गरी बस्ती बसाले र सोही बेलादेखि त्यहाँको नाम सैनिक रहन गएको हो । पुनर्वास गराउने कार्यमा नेपाल भूतपूर्व सैनिक संगठनका नेतृत्वकर्ता प्रकाशचन्द्र मुखिया (पीसी मुखिया) को मुख्य देन रहेको थियो । वि.सं. २०१९ सालमा राजा महेन्द्र इलाममा सवारी हुँदा स्वागत समारोह समितिको सचिवको हैसियतले पीसी मुखियाले भूपू सैनिकहरुलाई झापामा सामूहिक बसोबास गराउन बिन्ती चढाएका थिए । त्यसका लागि तत्कालीन गृहमन्त्री काजीमान कन्दङ्वाले सल्लाह दिएका थिए भने अञ्चल पञ्चायतका राष्ट्रिय निर्देशन अफिसर मेजर सन्तोषकुमार राईले पूर्णरुपमा सहयोग गरेका थिए । नेपाल भूतपूर्व सैनिक संगठनको जिल्ला सभापतिबाट अञ्चल सभापतिमा निर्वाचित भएका पीसी मुखियाले २०२० सालमा झापामा राजा महेन्द्रसंग दोस्रो भेट गरेपछि त्यही साल इलाम जिल्लामा रहेका दुईसय भूपू सैनिक परिवारलाई झापामा पुनर्वास गराउन एक हजार बिगाहा जग्गा प्रदान गर्ने निर्णय गरिएको थियो ।

त्यसपश्चात् सम्पूर्ण औपचारिक प्रक्रिया पूरा गरी २०२२ सालमा पीसी मुखियाको नेतृत्वमा कप्तान धनबहादुर घले, कप्तान जहरमान मुखिया, कहरसिंह लोक्तामलगायतका केही सदस्यहरु जग्गा छनोट गर्न झापा झरेका थिए । जिल्ला वन कार्यालयका तत्कालीन रेन्जर तुलसीराम कुँवरको सहयोगमा सो टोलीले एक हजार विगाह जमिनको सीमांकन गर्न गरेको थियो । पछि ६ सय बिगाह थप गरी सैनिक परिवारहरुले १६ सय बिगाह जग्गा पाएका थिए । सीमांकन संगसंगै हाल अर्जुन मुखियाको निवास रहेको परिसरमा सैनिक ब्यारेकको रुपमा क्याम्प नं. १ स्थापना गरी वनको रुपमा रहेको जग्गालाई खेतीयोग्य भूमिमा रुपान्तरण गर्ने कार्य जारी रह्यो । पुनर्वासलाई व्यवस्थित गर्न पछि अन्य दुईवटा क्याम्प थपिए ।

कालिमुनिमा क्याम्प नं. २ र भुतेनीमा क्याम्प नं. ३ स्थापना गरिएका थिए । क्याम्प नं. १ को लागि कमाण्डर धनबहादुर घले र क्वाटर मास्टर टेकबहादुर लिम्बू, क्याम्प नं. २ को लागि कमाण्डर कप्तान जहरमान मुखिया र क्वाटर मास्टर हवल्दार विक्रम गुरुङ तथा क्याम्प नं. ३ को लागि कमाण्डर कप्तान जयप्रसाद देवान र क्वाटर मास्टरमा रमनसिंह राई खटिएका थिए । क्याम्प निर्माणसंगै स–परिवार बसाइँ आउन थालेपछि क्याम्प नं. १ को छेउमा रुखको फेदमा एउटा पाठशाला पनि स्थापना गरिएको थियो । जसको पहिलो शिक्षक लप्टन गज्जबहादुर देवान थिए । क्याम्पमा रहेका सैनिक परिवारलाई खाद्य सामग्री रासन वितरण गरिन्थ्यो भने ती परिवारहरुले सामूहिक खेती गरेका थिए ।

२०२५ सालदेखि क्याम्पमा बसेका सैनिक परिवारहरु आफ्नो कोटामा कटेरो तयार गर्दै स्थानान्तरण हुन थाले । २०२८ सालमा राज्यमन्त्री बनेका पीसी मुखियाको बाहुलीबाटै उनीहरुलाई धनीपूर्जा वितरण पनि भयो । उनकै पहलबाट २०२७ सालसम्मको मालपोत छुट गरिएको थियो । सैनिक बजारको विकासको लागि धनशेर सुब्बाकी श्रीमती शान्ति सुब्बाले पनि ठूलो सहयोग गरेकी थिइन् ।

प्रतिक्रिया

कृपया प्रतिक्रिया लेख्नुहोस्!
कृपया आफ्नो नाम लेख्नुहोस्