झापा, माघ २८ । सशस्त्र प्रहरीले झापामा ठूलो परिमाणमा अवैध माछा बरामद गरी नष्ट पारेको छ ।
आज बिहान ११ः३० बजे सशस्त्र प्रहरी बल, नेपाल नं. २ गण हेडक्वाटर झापाबाट सशस्त्र प्रहरी सहायक निरीक्षक लोकेन्द्र पोख्रेलको कमाण्डमा खटिएको गस्ती टोलीले कन्काई १ जामुनखाडीस्थित पूर्वपश्चिम लोकमार्गअन्तर्गत जामुनखाडी चोकनजिकै अन्दाजी ४लाख २०हजार मूल्यबराबरको अन्दाजी १४०० के.जि. अबैध माछा बरामद गरेको हो ।
पश्चिमबाट पूर्वतर्फ आउँदै गरेको प्र. ०१–०२–००–२ च ४८४९ नम्बरको पिकअप गाडीलाई शंका लागेर चेकजाँच गर्ने क्रममा अबैध माछा बरामद भएको थियो । सवारी साधन तथा चालक सुनसरी इनरुवा– ७ बस्ने २४ वर्षीय दिलकुमार चौधरीलाई समेत नियन्त्रणमा लिई आवश्यक कारबाहीको लागि पशु क्वारेन्टाइन कार्यालय काँकडिभट्टाका निमित्त कार्यालय प्रमुख मुकेशकुमार सिंहको टोलीलाई बुझाएको सशस्त्र प्रहरी बल, नेपाल नं. २ गण हेडक्वाटर झापाका सूचना अधिकारी सशस्त्र प्रहरी नायव उपरीक्षक महेशराज बिष्टले जानकारी दिए ।
बरामद माछा क्वारेन्टाइन कार्यालयले सशस्त्र प्रहरी बल नेपाल नं. २ गण हेडक्वाटर झापाको हाताभित्र नेपाल प्रहरी, सशस्त्र प्रहरी बल, स्थानीय जनप्रतिनिधि तथा पत्रकारहरुको रोहबरमा खाल्डो खनेर नष्ट पारेकोसमेत बिष्टले जानकारी दिएका छन् ।
