झापा , फागुन २३ । झापाको भद्रपुरमा आगलागी हुँदा एक घर जलेर नष्ट भएको छ ।
आज बिहान ५ बजे भद्रपुर नगरपालिका वडा नं.९ शान्तिचोक बस्ने जगन्नाथ ढकालको टिनको छानो, टाटी बेरा भएको काठको २ तले घरमा आगलागी भएको हो । घरनजिकै रहेको गोठमा बालिएको आगोको झिल्काबाट सल्किएर भएको आगलागीबाट घर पूर्णरुपमा जलेर नष्ट भएको छ । आगलागीबाट घरभित्र रहेका अन्नपात, लत्ताकपडा, भाँडावर्तनलगायत सम्पूर्ण सामान, एउटा बाख्रा , एउटा गाईको बाच्छी, कुखुरा ३० वटा जलेर नष्ट हुँदा अन्दाजी ५ लाख १९ हजारबराबरको क्षति भएको जिल्ला प्रहरी कार्यालयले जनाएको छ ।
जिल्ला प्रहरी कार्यालयबाट प्रहरी निरीक्षक मेहेगी ल्हामु तामाङको कमाण्डमा १७ जना, कोशी प्रदेश प्रहरी विपद व्यवस्थापन गुल्म चन्द्रगढीबाट १३ जना, सशस्त्र प्रहरी वल नेपाल २ नं. गण हे.क्वा. चन्द्रगढीबाट १८ जना, भद्रपुर र बिर्तामोड नगरपालिकाको दमकल र स्थानीयबासीको सहयोगमा उक्त आगो बिहान ६ः१५ बजे पूर्णरुपमा नियन्त्रणमा आएको थियो ।
सोही घरनजिक रहेको गणेश ढकालको एकतले पक्की घरको झ्यालको ६ वटा सीसा फुटेको र मिटरवक्स जलेर नष्ट हुँदा अन्दाजी १८ हजारबराबरको क्षति भएको डीएसपी खगेन्द्र खड्काले जानकारी दिएका छन् ।
