झापा,चैत १ । राष्ट्रिय युवा संघका केन्द्रीय सदस्य तथा झापा जिल्ला इन्चार्ज खगेन्द्रराज आङदम्बे (राज)लगायत तीन जनामाथि आक्रमण गरेको आरोपमा अर्का एकजना पक्राउ परेका छन् ।

घटना भएको भोलिपल्ट पक्राउ परेका खगेन्द्र खालिङ राईका भतिजा पर्ने दुर्गा राई आज पक्राउ परेका हुन् । आज दिउँसो झिलझिले क्षेत्रबाट उनलाई पक्राउ गरिएको जिल्ला प्रहरी कार्यालयका डीएसपी खगेन्द्र खड्काले जानकारी दिए ।

मंगलवार मध्यरातमा बिर्तामोड–४ स्थित कर्णाली सहकारीको कार्यालयदेखि पश्चिमपट्टि ४५ वर्षीय खगेन्द्र खालिङ बस्ने डेराको अगाडि हतियार प्रहार भएको थियो । खालिङ केही वर्षदेखि गणेश प्रसाईको घरमा डेरा लिई बस्दै आएका छन् ।

विवादका क्रममा खालिङलगायतको समूहले धारिलो हतियार प्रहार गर्दा युवा संघका केन्द्रीय सदस्य आङदम्बेसहित तीनजना घाइते भएका थिए । घाइते हुनेहरुमा राष्ट्रिय युवा संघका केन्द्रीय सदस्य तथा झापा जिल्ला इन्चार्ज बिर्तामोड नगरपालिका वडा नम्बर ४ बस्ने बर्ष अन्दाजी ३७ का आङदम्बे , एमालेका बिर्तामोड नगर कमिटी सदस्य वडा नम्बर ९ बस्ने बर्ष अन्दाजी ३५ का विश्वदीप राजवंशी र एमालेकै कार्यकर्ता वडा नं ४ बस्ने वर्ष अन्दाजी ३० का अजय खवास रहेका छन् ।घाइतेहरुको बीएण्डसी अस्पतालमा उपचार भइरहेको छ ।

उनीहरुलाई खालिङलगायतको २–३ जनाको समूहले धारिलो हतियार प्रहार गरी घाइते बनाएको बताइएको छ । दुर्गा राई घटनाको मुख्य अभियुक्त भएको बताइएको छ । बिर्तामोड नगरपालिका वडा न.४ भद्रपुर रोडस्थित दरबार रेस्टुरेन्टमा उनीहरुले संगै खाएका थिए । त्यसपछि खगेन्द्र खालिङ र उनका भतिजा दुर्गा राई कोठा फर्किएका थिए । कोठामा आएर खालिङले आङदम्बेलाई बोलाएर हतियार प्रहार गरेको बताइएको छ ।

पाँचथरको हिलिहाङ गाउँपालिकाको भालुचोक घर भएका खालिङले ताप्लेजुङको कावेली हाइड्रोपावर हेर्ने गरेका थिए । त्यस हाइड्रोपावरसंगको लेनदेनको विषयमा दुवै साथीबीच विवाद परेको बताइएको छ ।

प्रतिक्रिया

कृपया प्रतिक्रिया लेख्नुहोस्!
कृपया आफ्नो नाम लेख्नुहोस्