झापा , चैत १९ । इलाम र धनकुटामा भएका आगलागीबाट दुई घर जलेर नष्ट भएको छ ।
आज बिहान २ बजे इलाम चुलाचुली ३ सुपारीबोटेस्थित चुली जंगलमा लागेको डढेलोको कारण सोही ठाउँ बस्ने ४३ वर्षीय मनबहादुर राईको काठको एक तले टाँडे खाली घरसमेत जलेर नष्ट भएको छ ।
आगलागीबाट घर पूर्णरुपमा जल्दा ६ लाख २० हजार बराबरको क्षति भएको इलाम प्रहरीले जनाएको छ । वडा अध्यक्ष प्रेमकुमार श्रेष्ठले प्रहरी चौकी पेल्टिमारीमा जानकारी गराउनसाथ प्रहरी टोली खटिएर उक्त आगो प्रहरी र स्थानीयको सहयोगमा पूर्णरुपमा नियन्त्रणमा आएको प्रहरी निरीक्षक संजिव बोगटीले जानकारी दिए ।
उता आज बिहान अन्दाजी ८ बजे धनकुटा महालक्ष्मी –२ मुलखर्क बस्ने नन्दकुमार थापाको घरमा आगलागी भएको छ । थापाको ढुंगा माटोले बनेको टिनको छानो भएको दुई तले घरमा बिद्युत सर्ट भई आगलागी भएको हो ।
आगलागीबाट घर आंशिक रुपमा जलेको, घरमा भएको अन्नपात, लत्ताकपडा, काठपात समेत जलि नष्ट हुँदा अन्दाजी १ लाख ५० हजार बराबरको क्षति भएको प्रहरीले जनाएको छ ।
