झापा , चैत २० । आजदेखि शुरु हुने काठमाण्डौ केन्द्रित आन्दोलनका लागि झापाबाट करिव हजार जना शिक्षक गएका छन् ।
पहिलो चरणको कार्यक्रमअन्तर्गत स्थानीय तहमा ज्ञापनपत्र बुझाउने ,धर्ना बस्ने,अन्तरक्रियात्मक कार्यक्रम ,शिक्षा विकास तथा समन्वय इकाइमा धर्ना ,प्रदेश राजधानीमा धर्ना जस्ता कार्यक्रम सकेर नेपाल शिक्षक महासंघ राष्ट्रिय समितिको आव्हानमा दोस्रो चरणको काठमाण्डौ केन्द्रित आन्दोलनको लागि झापाबाट त्यति शिक्षक गएका हुन् । नेपाल शिक्षक महासंघ झापाको समन्वयमा प्रत्येक स्थानीय तहमा गठित नेपाल शिक्षक महासंघले नेतृत्व गर्दै आ–आफ्नो पालिकाबाट गाडी रिजर्व गरि शिक्षकहरुलाई काठमाण्डौ लिएर गएको महासंघका जिल्ला अध्यक्ष नेत्रप्रसाद खरेलले जानकारी दिएका छन् ।
झापामा नेपाल शिक्षक महासंघ स्थानीय समितिका अध्यक्षहरुले नेतृत्व गर्नेछन् । बिर्तामोडको आन्दोलनको नेतृत्व युवराज कट्टेल,मेचीनगरको होमराज ढकाल ,भद्रपुरको पुरुषोत्तम खरेल,बाह्रदशीको गुणनिधी लुईटेल,अर्जुनधाराको चन्द्रवीर खत्री,बुद्धशान्तिको आनन्द कोइराला ,गौरीगञ्जको हरिलाल यादव ,झापा गापाको जगतनाथ राजवंशी आदिले पालिकागत रुपमा आन्दोलनको नेतृत्व गर्ने जनाइएको छ । शिक्षक महासंघ झापा अध्यक्ष खरेलसहित झापास्थित विभिन्न पेशागत संस्थाका अध्यक्षहरुले आवश्यक समन्वय र सहजीकरण गरिरहेका छन् ।
आन्दोलनको निम्ति प्रत्येक पालिकामा आन्दोलन परिचालन कोष निर्माण गरि कम्तीमा ७ दिनको लागि राजधानीतर्फ प्रस्थान गरेको जनाइएको छ । सोभन्दा बढी समेत बस्नुपर्ने स्थिति आउँदा मानसिक तयारी रहेकोले आवश्यक सहयोग र सद्भावको निम्ति सम्पूर्ण झापाली शिक्षक कर्मचारी ,विद्यार्थी ,अभिभावक ,संचारकर्मी साथै शुभेच्छुकहरुमा नेपाल शिक्षक महासंघ विर्तामोडका अध्यक्ष युवराज कट्टेलले अपिल गरेका छन् ।
