झापा,चैत २१ । तीनकुनेमा भएको हिंसात्मक प्रदर्शनका कमाण्डर दुर्गा प्रसाईलाई पक्राउ गर्न राजधानीको दुईवटा टोलीसहित प्रदेश , जिल्ला र बिर्तामोडका प्रायः सबै सुरक्षाकर्मी लागिपरेका छन् । विगत पाँच दिनदेखि प्रहरीले झापामा दुर्गा प्रसाईको संभावित ठाउँहरुमा सर्च अपरेशन जारी राख्दा पनि सफलता प्राप्त गर्न सकेको छैन ।
प्रसाईको बीएण्डसी अस्पताल , उनी बस्ने घरलगायत संभावित सबै ठाउँहरुमा सुरक्षाकर्मीहरुले निरन्तर निगरानी गरिरहँदा प्रसाईलाई फेला पार्न नसकेका हुन् । तीनकुने घटनापछि प्रसाई भागेर गृहजिल्ला झापा आएको भन्दै राजधानीबाट अपराध अनुसन्धान विभाग र विशेष इन्टेलिजेन्स व्यूरोको दुईवटा टोली खटिएका छन् । त्यस्तै कोशी प्रदेश , जिल्ला प्रहरी कार्यालय झापा र इलाका प्रहरी कार्यालय बिर्तामोडको टोलीहरु पनि परिचालित छन् । सबैतिर निगरानी गरिरहँदा अहिलेसम्म फेला पार्न नसकिएको इलाका प्रहरी कार्यालय बिर्तामोडका डीएसपी प्रकाश विष्टले बताए ।
देशभरि सुरक्षाकर्मी परिचालन भइरहँदा सुरक्षा निकायलाई चुनौती दिँदै प्रसाईंले आइतबार दिउँसो एउटा भिडियो पोस्ट गरेका थिए । जसमा उनले आफू काठमाडौंको एउटा मन्दिरमा रहेको दाबी गरेका थिए। यद्यपि, सुरक्षा एजेन्सीहरूले उक्त मन्दिर काठमाडौंमा नभएको पत्ता लगाए। नेपाल प्रहरीका एक अधिकारीले प्रसाईं मोटरसाइकलबाट रातारात भारत गएको हुन सक्ने बताए । ती प्रहरी अधिकारीले प्रसाईं हेटौंडा हुँदै भारत पुगेको र उनले नेपालको मन्दिरमा भएको दाबी गर्दै पोस्ट गरेको भिडियो भारतको मन्दिरमा छायांकन गरिएको दाबी गरेका छन्। यद्यपि, वरिष्ठ प्रहरी अधिकारीहरू यो दाबीप्रति विश्वस्त छैनन्। नेपाल प्रहरीका प्रवक्ता डीआईजी दिनेश आचार्यले प्रहरीले प्रसाईंको खोजी जारी राखेको बताएका छन् ।
आइतबार साँझ प्रहरी महानिरीक्षक (आईजीपी) दीपक थापाले सुरक्षा अधिकारीहरूलाई प्रसाईंलाई कुनै पनि हालतमा पक्राउ गर्न निर्देशन दिएका थिए । उनको कमान्डमा रहेका सबै निकायहरू उच्च सतर्कतामा छन्। सबै प्रहरी एकाइहरूले पाँच दिनसम्म निगरानी बढाए पनि अधिकारीहरूले प्रसाईंलाई अझै फेला पार्न सकेका छैनन्। नेपाल प्रहरीको केन्द्रीय अनुसन्धान ब्यूरो ( सीआइबी), विशेष ब्यूरो, काठमाडौं उपत्यका अपराध अनुसन्धान कार्यालय र काठमाडौं उपत्यका प्रहरी कार्यालयको “कार्यदल” ले उनको सक्रियतापूर्वक खोजी गरिरहेका छन्। सबै चेकपोस्टहरूमा प्रहरी बल तैनाथ गरिएको छ। केही अधिकारीहरूले प्रसाईं भारत भागेको हुन सक्ने आशंका गरेका छन् । एउटा प्रहरी एकाईले उनलाई पत्ता लगाउन भारतीय अधिकारीहरूसँग समन्वय गरिरहेको छ।
