झापा,चैत २३ । नेपालले हङकङमा हुने चार देशीय ट्वान्टी–२० क्रिकेट प्रतियोगिताका लागि शनिबार रोहित पौडेलको कप्तानीमा १४ सदस्यीय अन्तिम टोलीको घोषणा गरेको छ ।
प्रधानमन्त्री कप राष्ट्रिय क्रिकेट प्रतियोगिता सकिए लगत्तै नेपाली टोलीको बन्द प्रशिक्षण भैरहवामा भइरहेको छ र त्यही आधारमा राष्ट्रिय टोलीको छनोट गरिएको छ ।
छनोट भएका अन्य खेलाडीमा आसिफ शेख, कुशल भुर्तेल, लोकेश बम, बसिर अहमद, दीपेन्द्रसिंह ऐरी, कुशल मल्ल, गुलशन झा, सोमपाल कामी, करण केसी, नन्दन यादव, ललित राजवंशी, शाहव आलम र रिजन ढकाल छन् । बसिरले २ र नन्दनले ३ वर्षपछि राष्ट्रिय टोलीमा पुनरागमन गरेका हुन् । प्रतियोगितामा नेपालले बुधबार कतार, बिहीबार कुवेत र आउँदो शनिबार हङकङसँग खेल्दै छ ।
भैरहवामा नेपाली टोलीलाई ज्ञानेन्द्र मल्लले प्रशिक्षण दिँदै आएका छन् । नेपाल क्रिकेट संघ (क्यान) ले अघिल्लो साता राष्ट्रिय टोलीको प्रशिक्षकमा अस्ट्रेलियाका स्टुवार्ट ललाई छनोट गरेको थियो ।
