झापा, चैत २७ । पानीसंगै परेको चट्याङले लागेर एकजनाको मृत्यु भएको छ भने अर्का घाइते भएका छन् ।
चट्याङले लागेर गौरादहमा एकजनाको ज्यान गएको हो । आज बिहान अन्दाजी बिहान ७ बजे पाँचथर मिक्लाजुङ गाउँपालिका वडा न.३ आरुबोटे स्थायी ठेगाना भई हाल गौरादह नगरपालिका वडा न. ५ बालुबथानका गोमनाथ चेम्जुङको अधिया खेती गरी उनकै घरमा बस्दै आएका अन्दाजी ५४ वर्षीय दुधकुमार लावतीको चट्याङले लागेर मृत्यु भएको हो ।
भान्सा कोठामा खाजा खाने क्रममा पानीसंगै छेउमा नै परेको चट्याङको झड्काले लागेर उनको घटनास्थलमै मृत्यु भएको प्रहरीले जनाएको छ । मृतकको शवलाई कानुनी प्रकृया पुरा गरी पोस्टमार्टको लागि दमक अस्पताल दमक पठाएको जिल्ला प्रहरी कार्यालयले जनाएको छ ।
उता आज दिउँसो अन्दाजी १.३० बजे भोजपुरको भोजपुर नगरपालिका २ सिमे बस्ने ५५ वर्षीय रुन्चे तामाङ चट्याङले लागेर घाइते भएका छन् । घर छेउमा पानीसहित परेको चट्याङको झड्काले तामाङको बायाँपट्टिको भागमा चोट लागेको छ । उनलाई उपचारको लागि जिल्ला अस्पताल भोजपुर पठाएको प्रहरीले जनाएको छ ।
त्यस्तै मोरङमा चट्याङले आगलागी भएको छ । बिहान ८ः५५ बजे मोरङ केराबारी ९ देबीझोडा बस्ने अम्बर खड्काको घर छेउमा रहेको गाईगोठमा पानीसंगै परेको चट्याङबाट अचानक आगलागी भएको हो । आगलागीबाट गोठ र सोही गोठभित्र रहेको बोईलर फर्म जलेर नष्ट हुँदा बोईलर फर्ममा रहेका ४५० वटा बोईलर कुखुरा मरेका छन् । आगलागीबाट अन्दाजी ५ लाख बराबरको क्षति भएको प्रहरीले जनाएको छ ।
