झापा, जेठ २८ । स्थानीय एक युवतीलाई जवरजस्ती करणी गरी गर्भवती बनाई फरार भएका झापा गौरादह ९ का ५० वर्षीय डिकबहादुर राईलाई पक्राउ गरी कानुनी कार्वाही गर्न पीडित परिवारले माग गरेका छन् ।
राईलाई पक्राउ गरी कानुनबमोजिम कडाभन्दा कडा कारबाही गरी पाउँ भनी युवतीका आमाले हिजो इलाका प्रहरी कार्यालय झिलझिलेमा जाहेरी दिएकी छन् ।
राईले गत माघ महिनाको पहिलो हप्तातिर गौरादह वडा नं. ९ झमक चोकमा ३८ वर्षीया युवतीलाई घरमा कोही नभएको मौका पारी डर त्रास देखाई पटकपटक जवरजस्ती करणी गरेका थिए । ती युवती साढे पाँच महिनाको गर्भवती रहेको जनाइएको छ । गौरादह ९ का वडाध्यक्ष उपेन्द्र निरौलाले पीडित परिवारले न्याय नपाएको गुनासो गरिरहेको बताए । उनले दोषीमाथि कानुनी कार्वाही हुनुपर्ने बताए ।
अस्थायी प्रहरी चौकी बैगुनधुराबाट प्रहरी सहायक निरीक्षक राजेन्द्रप्रसाद सुवेदीको कमाण्डमा प्रहरी टोली खटिएर राईको खोजतलास भइरहेको प्रहरीले जनाएको छ । राई हिजोदेखि फरार भएका हुन् ।
