झापा,असार ५ । भिजिट भिसा प्रकरणमा छानबिन समितिको माग गर्दै रास्वपा र राप्रपाले प्रतिनिधिसभामा विरोध कायमै राखेका छन् ।
अघिल्ला दिनमा जस्तै बिहीबारको बैठकमा पनि राप्रपाले बैठक बहिस्कार ग¥यो भने रास्वपाका सांसदहरू बेल घेराउ गर्दै सभामुखको आसनअघि पलेँटी कसेर बसे ।
सभामुख देवराज घिमिरेले संसद् बैठक सुरु भएको जानकारी गराए लगत्तै रास्वपा र राप्रपाका सांसदहरू उठेर विरोध गरेका थिए । त्यसपछि सभामुख घिमिरेले रास्वपाका सांसद हरि ढकाललाई बोल्ने समय दिए ।
उनले सरकारले भुइँमान्छेका आवाज नसुनेको भन्दै विरोध गरे । उनले संसदमा आफूहरूको आन्दोलन जारी रहेको बताएपछि रास्वपा सांसदहरू उठेर बेल अगाडि पुगेका थिए ।
त्यसपछि सभामुखले राप्रपाका प्रमुख सचेतक समेत रहेका ज्ञानेन्द्रबहादुर शाहीलाई बोल्न समय दिएका थिए । उनले भिजिट भिसा प्रकरणमा छानबिन समिति नबनाएसम्म बैठक बहिस्कार गर्ने घोषणा गरे ।
त्यसपछि बोल्न समय पाएका माओवादीका प्रमुख सचेतक हितराज पाण्डेले प्रतिनिधि सभाको राज्य व्यवस्था तथा सुशासन समितिबाट पारित भएको निजामती विधेयकको संसद्को फुल हाउसबाट पारित गर्नुपर्ने बताए ।
उनले संसद् पुगेको विधेयक कार्यसूचीमा प्रवेश गरेर पनि हटाइएको भन्दै माओवादीले आपत्ति जनाउँदै तत्काल ल्याउन आग्रह गरे । त्यस्तै नेकपा एकीकृत समाजवादीका नेता राजेन्द्र पाण्डेले पनि सचिवहरुले संयुक्त राजीनामा दिन्छौँ भनेर विरोध गरेपछि विधेयक रोकिएको भन्दै सरकारलाई खुट्टा नकमाउन र विधेयक ल्याउन माग गरे ।
‘२५ जना सचिवले राजीनामा दिए नयाँ सहसचिव आउँछन् । धम्कीको भरमा यस्तो निर्णय गर्न खुट्टा कमाउनु हुँदैन’पाण्डेको भनाइ छ ।
