झापा,असार ६ । इजरायल र इरानबिचको युद्धका कारण नेपालीहरूको सुरक्षा र उद्धारका लागि एक युनिट बनाइने भएको छ ।
परराष्ट्र मन्त्रालयमा गृह, श्रम रोजगार तथा सामाजिक सुरक्षा र संस्कृति, पर्यटन तथा नागरिक उड्डयन मन्त्रालयस्तरीय बैठकले एक युनिट खडा गर्ने निर्णय गरेको हो ।
परराष्ट्र मन्त्रालयमा युनिट खडा गर्ने र चौबिसै घण्टा काम गर्ने निर्णय गरिएको हो । बैठकमा श्रममन्त्री शरदसिंह भण्डारी सहित श्रम, गृह र पर्यटन मन्त्रालयका सचिवहरूले आवश्यक समन्वय र सहयोगबारे छलफल गरेका थिए ।
स्वदेश फर्कन चाहने नेपालीहरूलाई परराष्ट्र मन्त्रालयले स्थापना गरेको पोर्टलमा दर्ता गर्न अपिल समेत गरेको छ । त्यहाँको अवस्थालाई युद्ध सुरु भएदेखि नै गम्भीर रूपमा हेरिरहेको र यदि कोही नेपालीले स्वदेश फर्कन चाहेमा उनीहरूलाई के कसरी उद्धार गरी ल्याउने भन्ने विषयमा पनि छलफल भएको थियो ।
