झापा, असार १९ । एम्स एजुकेशन एकाडेमी अर्जुनधाराले माध्यमिक शिक्षा परीक्षा एसईईमा उत्तीर्ण विद्यार्थीहरुलाई बधाई तथा शुभकामना दिएको छ।
अर्जुनधारा ८ मा अवस्थित विद्यालयको सभाहलमा भएको कार्यक्रममा माध्यमिक शिक्षा परीक्षा एसईई २०८१ मा उत्तीर्ण हुने र उच्च जीपीए प्राप्त गर्ने विद्यार्थी र तिनका अभिभावकहरूको उपस्थिति रहेको थियो।
विद्यालयका प्रधानाध्यापक ओमप्रकाश ओझाको सभापतित्वमा भएको कार्यक्रममा शिक्षक अभिभावक समन्वय समितिका अध्यक्ष रमेश नेपाल,विद्यालयका प्रबन्ध निर्देशक हरिप्रसाद फुयल, सहायक प्रधानाध्यापक मोहम्मद अजहरुद्दिन अलीले बधाई तथा शुभकामना मन्तव्य राखेका थिए। बिद्यार्थीको तर्फबाट दिपेश गुप्ताले आफ्ना अनुभवहरू राखेका थिए।
विद्यालयका सहायक प्रधानाध्यापक मोहम्मद अजहरुद्दिन अलीले स्वागत गरेको उक्त कार्यक्रमको सञ्चालन विद्यालयका गणित विषय शिक्षक त्रिलोचन दाहालले गरेका थिए।
बिद्यार्थीहरुलाई शुभकामना दिँदै प्रबन्ध निर्देशक फुयलले विद्यार्थीहरुको अबको भबिष्य विद्यार्थी स्वयंले कोर्नु पर्ने बताउँदै आफ्नो क्षमता अनुसार बिषय चयन गरेर पढ्न सुझाव दिएका थिए ।साथै भोलिका दिनमा उच्च तहमा पुगे पनि आफूले पढेको विद्यालयलाई कहिल्यै नबिर्सन आग्रह गरेका थिए ।
शिक्षक अभिभावक समन्वय संघका अध्यक्ष नेपालले हामीले बिद्यालयलाई काँचो माटोको रुपमा नानीबाबुहरु सुम्पिएका थियौ भने बिद्यालयले आज हाम्रा नानी बाबुहरुलाई आकार दिएको छ अब त्यसमा कस्तो रंग भर्ने हो त्यसको जिम्मा स्वयं विद्यार्थीहरु नै हुन् भन्दै शुभकामना दिएका थिए ।त्यस्तै प्रधानाध्यापक ओझाले विद्यार्थी र शिक्षकहरुको कडा मेहेनतले यो परिणाम आउन सफल भएको भन्दै सम्पूर्ण शिक्षक र बिद्यार्थीहरुप्रति आभार प्रकट गरेका थिए । बिद्यार्थी दिपेश गुप्ताले परिश्रमको फल मीठो हुन्छ भन्ने कविता वाचन गरेका थिए ।
