झापा, असार २१ । झापामा दुई वर्षअघि महामारीकै रूपमा फैलिएको लम्पी स्किनको संक्रमण बढ्दै गएको छ ।
जिल्लाका १५ वटौ पालिकामा लम्पी स्किनको संक्रमण फैलिरहँदा १० हजार ६१ वटा पशु चौपायामा संक्रमण देखिएको छ । हालसम्म झापामा यस रोगका कारण १४२ वटा गाईगोरु मरेको भेटेरिनरी अस्पताल तथा पशु सेवा विज्ञ केन्द्र झापाले जनाएको छ ।
गत साताको तुलनामा यो साता अझ बढी पशु चौपाया प्रभावित भएका छन् । गत साता ६ हजार २१ वटा चौपाया प्रभावित भएका थिए भने यो साता ४ हजार ४० वटा चौपाया प्रभावित भएका छन् । त्यस्तै गत साता ६८ वटा चौपाया मरेका थिए भने यो साता ७४ वटा चौपाया मरेका छन् ।
जिल्लामा सबैभन्दा धेरै बाह्रदशी र मेचीनगरमा संक्रमण देखिएको छ भने अन्य पालिकाको तुलनामा गौरादह र दमकमा संक्रमणको अवस्था कम छ । पशु सेवा विज्ञ केन्द्रको तथ्यांक अनुसार बाह्रदशीमा ३००९ संक्रमित २९ मृत्यु , मेचीनगरमा १९१८ संक्रमित ६ मृत्यु , बुद्धशान्तिमा ८४० संक्रमित ९ मृत्यु , कमलमा ५१३ संक्रमित ६ मृत्यु , शिवसताक्षीमा ४७० संक्रमित २ मृत्यु , बिर्तामोडमा ४६५ संक्रमित ११ मृत्यु , भद्रपुरमा ४३४ संक्रमित १२ मृत्यु , अर्जुनधारामा ४१३ संक्रमित २१ मृत्यु , गौरीगञ्जमा ३९९ संक्रमित ७ मृत्यु , कन्काईमा ३८२ संक्रमित ६ मृत्यु , कचनकवलमा ३३४ संक्रमित ८ मृत्यु , झापा गाउँपालिकामा ३१९ संक्रमित ५ मृत्यु , दमकमा २०० संक्रमित एक मृत्यु , गौरादहमा १९३ संक्रमित मृत्यु नभएको , हल्दिवारीमा १७२ संक्रमित १९ मृत्यु भएको छ । लम्पी स्किनबाट गाईगोरु मात्र प्रभावित भएका छन् । अहिलेसम्म एउटा भैसीमा मात्र लम्पी स्किन देखिएको छ ।
पशु सेवा विज्ञ केन्द्र झापाकी कार्यालय प्रमुख शीतल भट्टराईले लम्पी स्किनविरुद्धको भ्याक्सिन लगाउने कार्य जारी रहेको बताएकी छन् । उनले अहिलेसम्म ५७ हजार ३४८ वटा पशुलाई भ्याक्सिन लगाइएको जानकारी दिइन् । गौरादह र शिवसताक्षी नगरपालिकाले आफ्नै स्रोतमा खोप कार्यक्रम जारी राखेका छन् । अन्य पालिकामा पशु सेवा विज्ञ केन्द्रले उपलव्ध गराएको छ । ‘हालसम्म झापाका लागि ७२ हजार ५ सय भ्याक्सिन उपलब्ध भएको छ ।’ उनले भनिन्, ‘ जिल्लामा भ्याक्सिन पर्याप्त छ ।’
दुई वर्षअघि झापामा लम्पी स्किन रोगले महामारीकै रूप लिएको थियो । त्यसबेला ३५ हजार एक सयभन्दा धेरै गाईभैंसीमा लम्पी स्किन संक्रमण देखिएको थियो भने ४ हजार ६ सय ८५ पशुको मृत्यु भएको थियो ।
