झापा, असार २५ । गोली प्रहार गरी दुईजना लागूऔषध कारोबारी पक्राउ परेको भोलिपल्ट झापामा ठूलो परिमाणसहित फेरि एकजना पक्राउ परेका छन् ।
आज दिउँसो ३ बजे झापा गाउँपालिका वडा न.१सुडुघुट्टीमा इलाका प्रहरी कार्यालय कुमरखोदबाट प्रहरी नायव निरीक्षक किरण मोक्तानको कमाण्डमा खटिएको गस्ती टोलीले भारत बिहार किसनगंज सिंगीमारी पञ्चायत वडा न.५ बस्ने ६० वर्षीय गबरी साहलाई लागूऔषधसहित पक्राउ गरेको हो ।
भारतबाट नेपालतर्फ साइकलमा आउँदै गरेका साहलाई शंका लागेर चेकजाँच गर्ने क्रममा उनले लगाएको ट्रयाक सुटको बायाँ साईडको गोजीमा लुकाई छिपाई ल्याउँदै गरेको प्लाष्टिकसहित १०१ग्राम ६३ मिलिग्राम ब्राउनसुगर फेला परेको हो ।
साइकलसहित उनलाई नियन्त्रणमा लिई आवश्यक अनुसन्धान तथा कारवाहीको लागि जिल्ला प्रहरी कार्यालयमा राखिएको जनाइएको छ ।
