झापा, असार २५ । झापाको सीमावर्ती क्षेत्रमा भारतीय सवारी साधनका कारण दुर्घटना बढेको छ ।

भारतबाट आएकाहरुले तीब्र गतिमा सवारी साधन चलाउने गर्दा दुर्घटना बढेको हो । झापाको बाह्रदशीमा भारतीय मोटरसाइकलको तीब्र गतिका कारण आजको दुर्घटना भएको बताइएको छ । स्कुटर आफ्नो दिशामा रहेको र मोटरसाइकल तीब्र गतिमा भएका कारण दुईजनाको घटनास्थलमै मृत्यु भएको प्रत्यक्षदर्शीहरुले बताएका छन् ।
बुधवार दिउँसो ३.४० बजे बाह्रदशी गाउँपालिका १ खयरबारीस्थित भित्री सडकखण्डमा राजगढबाट कुटीतर्फ जादै गरेको बीआर ३७ एजेड ६४४० नम्बरको भारतीय मोटरसाइकल र बिपरीत दिशाबाट आउँदै गरेको प्र.१–०१–०१६ प ९२७० नम्बरको स्कुटर एकापसमा जुध्दा दुवै चालकको मृत्यु भएको हो । दुर्घटनामा स्कुटर चालक कचनकवल ३ डाकुपारा बस्ने ६० वर्षीय श्रीप्रसाद राजवंशी र मोटरसाइकल चालक भारत जिल्ला किशनगंज डिघलबैक थाना करलाबारी –१४ बस्ने २७ वर्षीय सुरज टुडूको मृत्यु भएको हो । स्कुटरमा सवार राजवंशीकी बुहारी २७ वर्षीया उर्मिला राजवंशी र नाति ७वर्षीय आयुष राजवंशी गंभीर घाइते भएका छन् । उनीहरुको बीएण्डसी अस्पताल बिर्तामोडमा उपचार भइरहेको छ ।
गत वर्ष पन्थापाडामा भारतीय नम्बरको मोटरसाइकलले ठक्कर दिँदा स्थानीय एक वृद्धको मृत्यु भएको थियो । ठक्कर दिएर फरार भएको मोटरसाइकललाई पक्राउ गर्न सकिएन ।
भारतको विहारमा मादक पदार्थको बिक्री वितरणमा प्रतिवन्ध लगाइएको छ । भारतीय सवारी चालकहरु नेपालमा आउँदा अधिकांशले मदिरा खाने गर्छन् । मदिरा खाएर जथाभावी चलाउँदा दुर्घटना बढेको बाह्रदशी १ का प्रवीण राजवंशीले बताए ।
पूर्वपश्चिम राजमार्गमा भन्दा ट्राफिक प्रहरीको उपस्थिति नभएको भित्री सडकहरुमा दुर्घटना बढेको जिल्ला ट्राफिक प्रहरी कार्यालय झापाले जनाएको छ । खुल्ला वातावरण पाएर जथाभावी चलाउने भारतीय सवारी साधनहरुको चेकजाँचमा प्रहरीले कडाई गर्नुपर्ने देखिएको सीमावर्ती क्षेत्रका बासिन्दाहरु बताउँछन् ।