झापा, असार २७ । झापाकै सबैभन्दा पुरानो र ख्यातिप्राप्त सगरमाथा बोर्डिङ स्कुल बन्द भएको छ ।
विद्यालय संचालकले चलाउन नसकेर विद्यालय बन्द गरेका हुन् । झापाको पहिलो संस्थागत विद्यालयको रुपमा २०४२ सालमा बिर्तामोडमा सो विद्यालय स्थापना भएको थियो । जुन विद्यालयको दर्ता नं ६ रहेको छ । शिक्षासेवी स्वर्गीय हरिकुमार प्रसाईलगायतले बिर्तामोड ४ मा सो विद्यालय खोलेका थिए ।संस्थापकहरुको कार्यकालमा शतप्रतिशत नतिजा निकालेपछि सगरमाथा आवासीय सेकेन्डरी स्कुलले राष्ट्रिय पुरस्कार प्राप्त गरेको थियो । सगरमाथाले जिल्लामा मात्र नभएर देशभरि नै ख्याति कमाएको थियो ।
पहिलाका संस्थापकहरुले छोडेर २०६४ सालदेखि सो विद्यालय मोहन सिटौलाले बिर्तामोड ५ मा संचालन गरेका थिए । सिटौलाले लिएपछि शुरुवात ताका राम्रै चलेपनि पछिल्लो समयमा न्यून विद्यार्थी थिए । राम्रो पढाइ नभएका कारण विद्यार्थीहरुले राम्रो नतिजासमेत निकाल्न सकेका थिएनन् । यस वर्षको एसईई परीक्षामा सो विद्यालय निल भएको थियो । यस वर्ष बिर्तामोड २ चैतुवारीको पंचरत्न मावि र सगरमाथा आवासीय बोर्डिङ स्कुलले कुनै पनि विद्यार्थीलाई उत्तीर्ण गराउन नसकेका हुन् । पंचरत्नका तर्फबाट १० र सगरमाथाका तर्फबाट ३ जना विद्यार्थी परीक्षामा सहभागी भएका थिए ।
त्यस्तै कक्षा ८ मा ६ जना विद्यार्थी अध्ययनरत रहेकोमा ५ जनाले परीक्षा दिएका थिए । त्यसमध्ये २ जना मात्र उत्तीर्ण भएका छन् । नयाँ शैक्षिक सत्रदेखि विद्यालय बन्द गरी सगरमाथाले आफ्ना विद्यार्थी अन्य विद्यालयमा ट्रान्सफर गरेको छ । कक्षा १० का विद्यार्थीहरु टावर टेम्पल स्कुलमा गएका छन् ।
विद्यालय नचलेपछि सगरमाथा स्कुल बन्द गरिएको संचालक सिटौलाले पुष्टि गरे । उनले आफ्ना विद्यालयमा अध्ययनरत विद्यार्थीहरुलाई अन्य विद्यालयमा पठाइएको जानकारी दिए । एक समयमा करिव १२ सय विद्यार्थी र ११० जना शिक्षक कर्मचारी रहेको आफ्नो विद्यालयमा पछिल्लो समय विद्यार्थी नभएपछि संचालन गर्न नसकिएको उनले बताए । शिक्षा क्षेत्रमा लामो समयदेखि लागेका सिटौलाले यसअघि पूर्वाञ्चल उच्च मावि चलाएका थिए ।
सगरमाथा स्कुलको ख्यातिकै कारण सो स्कुल जाने चोकको नाम सगरमाथा चोक राखिएको छ । सगरमाथा चोक रहेपनि सगरमाथा स्कुल अब इतिहासमा सीमित रहने एक स्थानीयले बताए ।
