झापा, असार ३२ । झापाको दमकमा स्कुटीको ठक्करबाट घाइते भएका वृद्धको मृत्यु भएको छ ।
आइतवार राति ८.३० बजे दमक वडा नं.१० जहदा टोलस्थित भित्री सडकखण्डमा मे.७ प.३७८९ नम्बरको स्कुटीले पैदलयात्री सोही ठाउँ बस्ने ७७ वर्षीय देवबहादुर श्रेष्ठलाई ठक्कर दिई घाइते बनाएको थियो । दाहिने हात भाँच्चिएको , टाउको , दुबै खुट्टा र अनुहारमा चोट लागेर बोल्न नसक्ने गम्भीर अबस्थाका वृद्धलाई निम्स अस्पताल दमकमा सामान्य उपचारपश्चात् थप उपचारको लागि बिराट टिचिङ अस्पताल बिराटनगर रेफर गरिएको थियो ।
त्यहाँ भेन्टिलेटरमा राखि उपचार भइरहेकोमा निको हुने संभावना नदेखेर परिवारले त्यहाँबाट घर ल्याएका थिए । घर ल्याउने क्रममा गम्भीर देखिएपछि दमक अस्पताल दमकमा ल्याइपुर्याउँदा गएराति ८ः५८ बजे चिकित्सकले मृत घोषणा गरेका थिए ।
आज इलाका प्रहरी कार्यालय दमकबाट प्रहरी टोली खटिएर कानुनी प्रकृया पुरा गरी पोस्टमार्टमपश्चात् मृतकका छोरा सुरेशकुमार श्रेष्ठले शव बुझेका छन् । स्कुटी चालक तेह्रथुम म्याङलुङ घर भई हाल दमक १० बस्ने थुम नारायण खापुङका छोरा १६ वर्षीय अर्चन खापुङलाई नियन्त्रणमा लिई अनुसन्धान भइरहेको जिल्ला प्रहरी कार्यालयले जनाएको छ ।मृतक श्रेष्ठ सेवानिबृत शिक्षक हुन् ।
