झापा,असार ३२ । श्रावण महिना सुरु हुन एक दिन बाँकी रहँदा चुरा, पोते र माला पसलेहरू व्यस्त देखिएका छन्।
श्रावण महिनामा हरियो, पहेंलो पोते–माला, चुरा, सारी लगायतका आभूषणहरूको माग अत्यधिक बढ्ने गर्दछ। हरियो चुरा, पोते र मेहन्दी व्यापारीलाई भ्याइ–नभ्याइ छ । अघिपछि खासै व्यापार नभएपनि साउन लागेसँगै यस्ता सामग्रीले बजार पिट्ने गर्छन्। विशेषगरी हिन्दू महिलाहरूले यो पवित्र महिनामा यस्ता आभूषणहरू लगाउने चलन छ। हरियो रंगलाई समृद्धि, सौभाग्य र हरियालीको प्रतीक मानिन्छ।
व्यवसायीहरूका अनुसार, अन्य महिनाको तुलनामा श्रावण महिनामा बिक्री बढ्ने गर्दछ ।
पौराणिक मान्यताअनुसार श्रावणलाई शिवको महिनाका रूपमा लिइन्छ। यस महिनामा पर्ने हरेक सोमबार विशेषगरी महिला दिदीबहिनीहरु रातो, हरियो र पहेलो वस्त्रधारण गरी भगवान् शिवको नाममा व्रत बस्ने र शिव मन्दिरमा गई पूजा आराधना गर्ने गर्छन्। महिनाभर ब्रतालु महिला तथा पुरुषले माछामासु नखाई सात्विक भोजन गर्ने गर्छन्।
श्रावणमा हरियो चुरा, पोते तथा पहिरन लगाउने फेसनकै रूपमा प्रचलन बढ्दै गएको देखिन्छ। हरियो, रातो र पहेलो रंगको विशेष महत्व छ। हरियोलाई प्रेम र वातावरणको, रातोलाई सौभाग्यको तथा पहेंलोलाई पवित्रताको प्रतीकका रूपमा लिइन्छ। त्यसैले साउनभर हरियो बस्त्र, हरियो चुरा, हरियो पोते र हरियो टिका लगाउने चलनलाई प्रकृतिको सम्मान हो भनेर बुझ्न सकिन्छ। हिन्दू धर्ममा विश्वास गर्नेहरूका लागि श्रावण महिना आत्मशुद्धि, श्रद्धा र भक्तिको समय हो।
