झापा, साउन १ । इलाममा हतियार प्रहारबाट भाइको मृत्यु भएको छ भने दाई गंभीर घाइते भएका छन् ।
गएराति ९.५० बजे इलाम सूर्योदय नगरपालिका १ भालुखोपस्थित ससुराली घरमा बस्दै आएका माईजोगमाई गाउँपालिका २ तारसिंह गाउँ बस्ने ३२ वर्षीय निरोज चापागाई हतियार प्रहारबाट गंभीर घाइते भएका छन् भने उनका भाइ २१ वर्षीय प्रकाश चापागाईको घटनास्थलमै मृत्यु भएको हो ।
सूर्योदय १ सिरिसे बस्ने ३३ वर्षीय किरण शेर्पाले उनीहरुमाथि हतियार प्रहार गरेका थिए । भालुखोपस्थित काजी तामाङको घरमा आफ्ना भाइ २१ वर्षीय प्रकाशलाई लिई निरोज ससुराली घरमा बस्दै आएका थिए । झगडा भएपछि किरणले प्रकाशलाई धारिलो हतियारले प्रहार गर्दा घटनास्थलमा नै मृत्यु भएको छ भने पेटमा धारिलो हतियार प्रहारबाट निरोज गम्भीर घाइते भएका छन् । उनलाई उपचारको लागि फिक्कल अस्पतालतर्फ पठाइएको छ ।
प्रहरी चौकी गोर्खेबाट प्रहरी टोली घटनास्थलमा पुगी घटनास्थल सुरक्षित राखेको छ । धारिलो हतियार प्रहार गर्ने किरण तत्काल फरार रहेकोमा इलाका प्रहरी कार्यालय पशुपतिनगरबाट प्रहरी निरीक्षक छे फिन्जो भोटेको कमाण्डमा १० जना प्रहरी टोली खटिएर उनलाई सूर्योदय १ मानेभञ्ज्याङबाट नियन्त्रणमा लिएको जिल्ला प्रहरी कार्यालय इलामले जनाएको छ ।
