झापा, साउन १ । झापामा फरार अभियुक्त धमाधम पक्राउ पर्दै गएका छन् । गत वर्षको तुलनामा यस वर्ष फरार अभियुक्त पक्राउ संख्या बढेको हो ।
गत वर्ष ४२७ जना पक्राउ परेका थिए । यस बर्ष ५३४ जना फरार अभियुक्त पक्राउ परेका छन् । फरार प्रतिवादी पक्राउ संख्या २५ प्रतिशतले बढेको हो । चालु आर्थिक वर्ष २०८१÷०८२ मा विभिन्न मुद्दा शीर्षकमा फरार रहेका ४६३ पुरुष, ७० महिला र एक यौनिक अल्पसंख्यक गरी जम्मा ५३४ जना फरार अभियुक्तलाई पक्राउ गरिएको जिल्ला प्रहरी कार्यालयका प्रवक्ता डीएसपी खगेन्द्र खड्काले बताए ।
झापा जिल्ला अदालतबाट फैसला कार्यान्वयन भई फरार सूचीमा रहेका उनीहरूलाई जिल्ला प्रहरी कार्यालय झापा र मातहत प्रहरी युनिटहरूबाट खटिएको प्रहरी टोलीले पक्राउ गरेको थियो ।
पक्राउ परेका उनीहरूबाट ७ करोड २७ लाख २४ हजार ८ सय २१ रुपैयाँ ६६ पैसा जरिवाना असुल उपर गरिएको छ । गत वर्षको तुलनामा जरिवाना पनि बढेको हो । गत वर्ष ५ करोड ४ लाख ९८ हजार १४३ रुपैयाँ जरिवाना असुल भएको थियो ।
पक्राउ परेकाहरूलाई झापा जिल्ला अदालतमा उपस्थित गराई कैद असुल बाँकी रहेका अयिभुक्तहरुलाई अदालतको आदेश बमोजिम कैद भुक्तानका लागी झापा कारागार चलान गरिएको छ ।
यसै क्रममा प्रहरीले सर्वोच्च अदालतको मिति २०८० कात्तिक १९ गतेको फैसला अनुसार जबरजस्ती करणी तथा हाडनाता करणी मुद्दामा १० वर्ष कैद सजाय फैसला भई फरार रहेका भद्रपुर नगरपालिका–८ का ४८ वर्षीय खेमराज पोखरेल, उच्च अदालत विराटनगर इलाम इजलासको मिति २०७२ असार १६ गतेको फैसलाले जबरजस्ती करणी र जबरजस्ती चोरी मुद्दामा १० वर्ष कैद फैसला भई फरार रहेका मेचीनगर नगरपालिका–७ का ३२ वर्षीय प्रदीप राई र उच्च अदालत पाटनको मिति २०८० फागुन २९ गतेको फैसलाले राजश्व चुहावट मुद्दामा १ वर्ष २ महिना १५ दिन कैद र दुई करोड ८४ लाख ५८ हजार छ सय पाँच रुपैयाँ जरिवाना फैसला भई फरार रहेका बिर्तामोड नगरपालिका–८ का ३० वर्षीय अमिर ल्वागुन विश्वकर्मालगायतका अभियुक्तहरू पक्राउ परेको जिल्ला प्रहरी कार्यालय झापाले जानकारी दिएको छ । जिल्ला प्रहरी कार्यालयसंग फरार प्रतिवादीहरुको तथ्यांक २६०६ जनाको रहेको छ ।
