झापा, साउन ९ । प्रहरीले झापाको मेचीनगरमा डग स्न्यापिङ गरी लागूऔषधमा संलग्न तीनजनालाई पक्राउ गरेको छ ।

हिजो साँझ ५ बजे मेचीनगर –९ र १० को संभावित ठाउँहरुमा कोशी प्रदेश प्रहरी कार्यालय के नाईन शाखा, धरानबाट खटिएको डग स्न्यापिङ टोलीले डग स्न्यापिङ गरेको थियो । त्यसक्रममा ट्रमाडोल ६८ क्याप्सुलसहित मेचीनगर –९ झोडा बस्ने २४ वर्षीय रोशन डाँगी , लागूऔषध सेवनकर्ता सोही ठाउँ बस्ने २२ वर्षीय अर्जुन दर्जी र लिलाबस्ती बस्ने २८ वर्षीय रविन राजवंशी प्लाष्टिकबाहेक १ ग्राम १९० मिलिग्राम ब्राउनसुगरसहित पक्राउ परेका छन् ।

उनीहरुलाई पक्राउ गरी इलाका प्रहरी कार्यालय धुलाबारीमा ल्याई आवश्यक अनुसन्धान भइरहेको जिल्ला प्रहरी कार्यालयले जनाएको छ । अपराध रोकथाम,लागूऔषध नियन्त्रण, पहिचान तथा न्यूनीकरणका लागि २ वटा शिकारी कुकुरबाट डग स्न्यापिङ गरिएको थियो ।

मेचीनगर–९ झोडा ,लिलाबस्ती, खुट्टिडाँगी ,मेचीनगर –१० पाथिभरा टोल,खयरडाँगी,दनुवार बस्ती एरियामा डग स्न्यापिङ गरिएको थियो ।

प्रतिक्रिया

कृपया प्रतिक्रिया लेख्नुहोस्!
कृपया आफ्नो नाम लेख्नुहोस्