झापा, साउन १३ । मोटरको तार जोड्ने क्रममा करेन्ट लागेर झापा कचनकवलका एकजनाको मृत्यु भएको छ ।
गएराति कचनकवल वडा नं ७ सिधागुरी टोल बस्ने ५० वर्षीय अरूण राजवंशीको घरनजिकै रहेको सिँचाईको मोटरमा तार जोडने क्रममा करेन्ट लागेर मृत्यु भएको हो । थप अनुसन्धान तथा कानुनी प्रकृयाको लागि जिल्ला प्रहरी कार्यालय झापाबाट टोली खटिएको थियो । सम्पूर्ण कानुनी प्रकृया पुरा गरी शव पोस्टमार्टमको लागि प्रादेशिक अस्पताल भद्रपुरतर्फ पठाइएको जिल्ला प्रहरी कार्यालयका डीएसपी खगेन्द्र खड्काले बताए ।
राजवंशी खेतमा पानी लगाउनका लागि नाङ्गो खुट्टा, हातमा टेप बोकी मोटर चालु गर्न गएका थिए । मोटरको एउटा तार चुँडिएकोले करेन्ट लागेर मृत्यु भएको हुनसक्ने स्थानीयको बुझाई रहेको छ ।
स्थानीयका अनुसार अव्यवस्थित रूपमा जडान गरिएको विद्युत लाइनमा आफैंले मोटर जडान गर्न खोज्दा करेन्ट लागेको हो । घटना राति करिब ९ः३० बजे घटेको भएपनि घरमा कोही पनि नभएकोले विहान मात्र थाहा भएको थियो । विहान प्रत्यक्षदर्शीले शव देखेपछि प्रहरीलाई खबर गरेका थिए।
यो घटनासँगै कचनकवल गाउँपालिकामा पछिल्लो एक वर्षको अवधिमा करेन्ट लागेर ज्यान गुमाउनेको संख्या ३ पुगेको छ। लगातार बढ्दो यस्ता घटनाले स्थानीयमा चिन्ता बढेको छ। अव्यवस्थित विद्युत जडान र सुरक्षाको बेवास्ता यस्ता घटनाका प्रमुख कारण बन्न पुगेका छन्।
