झापा, साउन १४ । फेसबुकमा लेखेको विषयलाई लिएर बिर्तामोड नगरपालिकाका उपप्रमुख नगेन्द्र संग्रौला र वडाध्यक्ष अजय कार्कीले नगरपालिका कार्यालयमा आज गरेको लफडाबाट नगरवासीहरु लज्जित भएका छन् ।
आफूहरुको अमूल्य मतबाट जितेर गएका जनप्रतिनिधिहरुले यसरी नगरपालिका कार्यालयमै गरेको अशोभनीय र अमर्यादित कार्यले नगर र नगरवासीको प्रतिष्ठामै आँच पुगेको उनीहरुको बुझाई छ । फेसबुकमा लेख्न नहुने र लेखेकै कारण लोकलाज हुने गरी नगरपालिका कार्यालयमा घटाएको घटनाले लज्जित बनाएको एक नगरवासीले बताए ।
लफडाका क्रममा दुई जना जिम्मेवार जनप्रतिनिधिहरुले बोलेको शव्द र गरेको व्यवहारसहितको भिडियो सामाजिक संजालमा पोस्ट गरिएको छ । जुन भिडियोप्रति अधिकांशले तीब्र आलोचना गरेका छन् ।
आज दिउँसो नगर उपप्रमुखको कार्यकक्षमा उपप्रमुख संग्रौला र वडाध्यक्ष कार्कीबीच हात हालाहालको अबस्था सिर्जना भएको थियो । सामाजिक संजाल फेसबुकमा उपप्रमुख संग्रौलाले “नेपाली नागरिकता बेचेर खाने, जेल हाल्नु पर्ने मानिस अदालतले फैसला अड्काउने , पुनः निर्वाचन लड्न अवसर दिने, सोही मुद्दामा परेका मानिस जेल बस्नुपर्ने , राष्ट्रद्रोही मानिसलाई अझै पनि भोट हाल्नु पर्छ ” जस्ता शब्दहरु वडाध्यक्ष कार्कीको विरुद्धमा लेखेका थिए ।
सोही विषयलाई लिएर वडाध्यक्ष कार्की आफ्नो नेतृत्वमा करिब ३० जना युवा लिएर उपप्रमुख संग्रौलाको कार्यकक्षमा विवाद गर्न गएका थिए । हात हालाहाल नभई दुवैबीचको घम्साघम्सीमा एक अर्काले चर्काचर्की गर्दै अपशव्द प्रयोग गरेका छन् । पछि प्रहरी आइपुगेपछि दुवैजनालाई छुट्याएको थियो ।
उपप्रमुख संग्रौलाले अत्यन्त नराम्रो शव्द प्रयोग गरी फेसबुकमा लेखेपछि आफूहरु संझाउन जाँदा विवाद भएको वडाध्यक्ष कार्कीले बताए । उता उपप्रमुख संग्रौलाले वडाध्यक्ष कार्कीले आफ्नो विरुद्धमा गलत प्रचार गरेपछि आफूले सो टिप्पणी गरेको प्रतिक्रिया दिएका छन् ।
