बिर्तामोड, साउन १५ । पर्वत जिल्ला कुस्मा स्थायी घर भएका र लामो समयदेखि यूकेमा बसोबास गर्दै आएका ४२ वर्षीय स्वर्गीय बिज्ञान गौतम ( उदय ) को जन्म जयन्तीको अवसरमा विर्तामोडका एक परिवारलाई आर्थिक सहयोग गरिएको छ ।
सन् २०२३ देखि क्यान्सर रोग लागेका गौतमको गत वर्षको ७ जुलाई २०२४ मा उपचारको क्रममा निधन भएको थियो । २८ जुलाईमा भएको उनको जन्म जयन्तीको स्मृतिमा उनकी श्रीमती दीपा महरा गौतमले स्वर्गीय आत्माको शान्तिको कामना गर्दै उक्त सहयोग गरेको जनाएकी छन् ।
बिर्तामोड ५ , अग्रसेन भवन पछाडी सुकुम्वासी टोल निवासी माया कुँवरका ३५ वर्षीय छोरा रेवत र २९ वर्षीया छोरी कोपिलाको दुवै खुट्टा चल्न नसक्ने भएर हिडडुल गर्न नसक्ने अवस्थामा छन् । उनीहरुको आर्थिक अवस्था नाजुक भएको र नागरिकता नबनेको कारण सरकारी भत्ता पनि प्राप्त गर्न सक्ने कानूनी ब्यवस्था नभएकोले १८ हजार २ सय ५० रुपैयाँं आर्थिक सहयोग गरिएको गोर्खा फाउण्डेशनका अध्यक्ष वीरु दर्नालले बताए ।
गोर्खा फाउण्डेशनको समन्वयमा उक्त सहयोग हस्तान्तरण गरिएको हो । सन् २०१० देखि यूकेमा रहेका गौतमको स्थायी घर धरान भएकी दीपा महरासँग सन् २०११ मा यूकेमै विवाह भएको थियो । गौतम परिवारको ७ वर्षकी एक छोरी दिव्याना रहेकी छिन् । सरल स्वभावका गौतमको मोडलिङ र कला क्षेत्रमा रुचिका कारण नेपाली चलचित्रहरु तिर्खा , तार्गेट , बलवान , जंगल क्विनलगायतमा अभिनयसमेत रहेको छ । श्रीमती गौतमका अनुसार स्वर्गीय गौतम एक असल अभिभावक , ब्यवहारिक ब्यक्तित्व र सरल स्वभावका थिए ।
सम्बन्धित टोलका अग्रज नन्दलाल पोखरेलले नगद हस्तान्तरण गरेको कार्यक्रममा चक्र परियार , कमल पाठक , पर्शुराम पोखरेललगायतको उपस्थिति रहेको थियो ।
