बिर्तामोड , साउन १५ । झापाको बिर्तामोडमा पहिलोपटक भव्यरुपमा गाईजात्रा उत्सव हुने भएको छ ।
नेवाः देय् दबू जिल्ला कार्यसमिति झापाको आयोजना तथा नेवाः देय् दबू बिर्तामोड नगर समिति र नेवाः मिशा दबू झापाको सहआयोजनामा गाईजात्रा उत्सव तथा लाखे प्रतियोगिता हुने भएको हो । यही साउन २४ गते बिर्तामोडमा उक्त कार्यक्रम हुने भएको हो। झापाको बिर्तामोडमा पहिलो पटक गाईजात्रा उत्सव तथा लाखे प्रतियोगिताको आयोजना गरिएको कार्यक्रम संयोजक नेवाः देय् दबूका कोशी प्रदेशका निवर्तमान अध्यक्ष इन्द्रबहादुर श्रेष्ठले बताए।
कार्यक्रममा ख्यातिप्राप्त कवि तथा कलाकारहरूले व्यङ्ग्यात्मक साहित्यिक प्रस्तुती प्रस्तुत गर्ने भएका छन् । त्यसपछि लाखे प्रतियोगिता गरिने उनले बताए। हाँस्यव्यंग्य प्रस्तुतकर्ताहरु होम सुवेदी , चूडामणि वशिष्ठ , गणेश निरौला , केशव आचार्य , टंक विकल्प , पिनाकी कोइराला , मदन भण्डारी , विकास शिवा , रहस्यविक्रम चिमरिया , राजीव हलवाई , परिक्रमा श्रेष्ठ , जीवनकुमार श्रेष्ठ, कृष्ण अनमोल र सुरेन्द्र श्रेष्ठको प्रस्तुती रहने जनाइएको छ । त्यस्तै जिल्लाका सवै पालिकाहरुबाट लाखे नाच टोलीको सहभागिता रहने आयोजकले जनाएको छ । लाखे प्रतियोगितामा प्रथम हुनेलाई १० हजार,द्वितीयलाई ७ हजार,तृतीयलाई ५ हजार र सहभागी सबैलाई जनही एक–एक हजार पुरस्कार दिइने कार्यक्रम संयोजक श्रेष्ठले बताए ।
कार्यक्रममा नेवाः देय् दबू झापा जिल्ला कार्यसमितिका अध्यक्ष यामबहादुर श्रेष्ठले स्वागत गरेका थिए।
कार्यक्रममा प्रचारप्रसार संयोजक ओमप्रकाश श्रेष्ठले कार्यक्रमको तयारीबारे सहभागीहरुलाई जानकारी गराएका थिए।
कार्यक्रममा आदिवासी जनजाति महासंघ झापाका पूर्व अध्यक्ष भरत श्रेष्ठले गाईजात्राको इतिहासबारे जानकारी गराउँदै नेवारी धर्म परम्परा, संस्कार संस्कृतिको संरक्षण गर्न बिर्तामोडमा गाईजात्रा उत्सव तथा लाखे प्रतियोगिताको आयोजना गरिएको बताए। कार्यक्रमको सञ्चालन नेवाः देय् दबू झापा जिल्ला कार्यसमितिका सचिव लक्ष्मणज्वयल श्रेष्ठले गरेका थिए ।
