झापा, साउन १६ । आफ्नै घरको राँगाले हानेर ओखलढुङ्गामा एकजनाको मृत्यु भएको छ ।
हिजो बिहान ९.३० बजे ओखलढुङ्गा सुनकोशी गाउँपालिका –४ डाँडा जेरुङ बस्ने ७२ वर्षीय बलबहादुर श्रेष्ठले आफ्नै घरको राँगा ,गोठबाट बारीमा सार्ने क्रममा नाकमा लगाएको डोरी चुँडाइ राँगाले हानेको थियो । राँगाले हानेर गोरेटो बाटोभन्दा अन्दाजी ३ मिटर तल झरेर श्रेष्ठको घटनास्थलमा नै मृत्यु भएको प्रहरीले जनाएको छ ।
यता सुनसरीमा भाग्ने क्रममा टाँटीमा च्यापिएर निलगाई मरेको छ ।
हिजो बिहान ११ः३० बजे सुनसरी हरिनगर गाउँपालिका ३ गौतमपुरमा जंगलबाट गाउँतर्फ आएको निलगाई स्थानीयले देखेर प्रहरी चौकी गौतमपुरमा जानकारी गराएका थिए । प्रहरी टोली खटिएर वन कार्यालयको कर्मचारीको सहयोगमा समाउने क्रममा सो निलगाई भागेर जमाल अन्सारी र सहवाज अन्सारीको घरको बिचको टाँटीको चेपमा च्यापिन गई मरेको प्रहरीले जनाएको छ ।
