झापा, साउन १९ । बिर्तामोड नगरपालिकाका उपप्रमुख नगेन्द्रप्रसाद संग्रौलासंगको फेसबुके विवादलाई लिएर वडाध्यक्ष अजय कार्कीको आन्दोलन थामिएको छैन ।
वडाध्यक्ष कार्कीआवद्ध राष्ट्रिय प्रजातन्त्र पार्टीले उपप्रमुख संग्रौलालाई कार्वाही नगरेसम्म आन्दोलन नरोक्ने निर्णय गरेको हो । राप्रपा बिर्तामोड नगर समितिको हिजो बसेको आकस्मिक बैठकले आन्दोलनलाई निरन्तरता दिने निर्णय गरेको हो ।
‘आज हामी ज्ञापनपत्र बुझाउन नगरपालिका जाँदैछौं ’नगर अध्यक्ष लक्ष्मी गौतमले भने ,‘ उपप्रमुख संग्रौलाको अराजकताका सम्बन्धमा नगर प्रमुखको हामीलाई जवाफ चाहियो ।’ आज बिहान १० वजे बिर्ताबजारको दुर्गा मन्दिर अगाडि भेला भएर नगरपालिकामा ज्ञापनपत्र बुझाउन जाने कार्यक्रम रहेको बताइएको छ ।
सो घटनालाई लिएर तीन दिनअघि राष्ट्रिय प्रजातन्त्र पार्टी र नेकपा माओवादी केन्द्रले उपप्रमुख संग्रौलालाई कार्वाहीको मागसहित नगरपालिका कार्यालयअगाडि नाराजुलुस गरेका थिए । बाक्लो संख्यामा रहेका प्रहरीले उनीहरुलाई नगरपालिका गेटभित्र प्रवेश गर्न दिएन । भित्र प्रवेश गर्न नपाएपछि गेट बाहिर उनीहरुले नाराजुलुस र कोणसभा गरेका थिए । आजको विरोध र्यालीमा माओवादी केन्द्रको सहयोग रहने वा नरहने भनेर टुंगो भइनसकेको नगर अध्यक्ष गौतमले बताए ।
उता नगर उपप्रमुख संग्रौलाले सामाजिक संजालमा नकारात्मक कुरा लेख्न छाडेका छैनन् । उनले हिजो आफ्नो फेसबुकमा लेखेका छन् ‘ बिर्तामोड इमानदारहरुको बासस्थान बस्ने शहर हो,नकि गतिछाडाको।’
साउन १५ गते बसेको बिर्तामोड नगरपालिकाको कार्यपालिकाको बैठकले व्यक्तिगत अफवाह फैलाउने, सामाजिक सञ्जालमा नकारात्मक टिप्पणी गर्ने जस्ता कार्य पूर्णतः बन्द गर्न जनप्रतिनिधिहरुलाई सचेत गराएको थियो ।
