झापा, साउन २४ । सुनसरीको इटहरीमा भएको सवारी दुर्घटनामा बिर्तामोडका दुई युवाको मृत्यु भएको छ ।
आज बिहान ११;२० बजे इटहरी उप–महानगरपालिका वडा नं.२० पानीपिया जंगलस्थित कोशी लोकमार्गमा धरानबाट इटहरीतर्फ आउँदै गरेको को २२ प २१२५ नं. को स्कुटर र इटहरीबाट धरानतर्फ जाँदै गरेको प्रदेश नं. १ –०२–००२ ख ०४५५ नं. को बस एक आपसमा ठोक्किएको थियो ।
दुर्घटनामा स्कुटर चालक विर्तामोड ५ बस्ने वर्ष अन्दाजी २६ का सुजन बि.क. र पछाडि सवार सोही ठाउँ बस्ने बर्ष अन्दाजी २२ का सुरज बि.क. को मृत्यु भएको हो । दुबै घाइतेलाई उपचारको लागि बीपी कोइराला स्वास्थ्य विज्ञान प्रतिष्ठान धरान पठाएकोमा उपचारका क्रममा १२;३० बजे दुवैको मृत्यु भएको प्रहरीले जनाएको छ ।
इलाका प्रहरी कार्यालय इटहरीबाट प्रहरी नायव उपरीक्षक लक्ष्मी भण्डारीको कमाण्डमा प्रहरी टोली खटिएर स्कुटर , बस र बस चालक उदयपुर बेलका ३ बस्ने २९ वर्षीय प्रेम मगरलाई नियन्त्रणमा लिएको छ ।
