झापा, साउन ३० । बिर्तामोडलाई शैक्षिक हब बनाउन ठूलो योगदान दिएका गुरुभक्त न्यौपानेको निधनले अपुरणीय क्षति पुगेको छ ।
हरिकुमार प्रसाईको अभाव खड्किरहेका बेला शिक्षासेवी न्यौपानेको निधनबाट शैक्षिक क्षेत्रले अर्का अभिभावकसमेत गुमाएको हो । कन्चनजंघा अंग्रेजी माध्यमिक विद्यालयका संस्थापक प्राचार्य न्यौपानेको आज बिहान ७.४० बजे घरमै निधन भएको हो । उनी क्यान्सर रोगबाट पीडित थिए । बीएण्डसी अस्पतालमा भर्ना गरिएका न्यौपानेलाई बिहीवार घर ल्याइएको थियो । विभिन्न शिक्षण संस्थामा अध्यापन गरेका न्यौपानेले शैक्षिक क्षेत्रमा ठूलो योगदान दिएका छन् । वि.सं. २०१७ साल असार २८ गते छातेढुंगा गाविस वडा नं ९ टुँडिखेल, आठराई तेह्रथुममा पिता नन्दलाल न्यौपाने र माता चन्द्रमाया न्यौपानेको कोखबाट जन्मेका न्यौपानेले प्रारम्भिक शिक्षा जनकल्याण प्रावि टुँडिखेलबाट हासिल गरेका थिए ।
त्यस्तै २०३४ सालमा पोखरी हाईस्कुल आठराईबाट एसएलसी उत्तीर्ण गरेका थिए । उच्च शिक्षा हासिल गर्नेक्रममा २०४० सालमा धनकुटा बहुमुखी क्याम्पसबाट बी.एड. र २०४६ सालमा त्रिभुवन विश्वविद्यालयबाट एम.ए. उत्तीर्ण गरेका थिए । २०४० साल माघमा डिल्लीकुमारी ढुंगेलसंग वैवाहिक बन्धनमा बाँधिएर पारिवारिक जीवन यात्रा शुरु गरेका उनले २०४१ सालबाट साविक अनारमनी २ मा स्थायी बसोबास गरेका थिए ।
उनले आफ्नो शिक्षण तथा अध्यापन कार्य शारदा मावि चुहानडाँडाबाट २०३६ सालमा शुरु गरी सो यात्रामा जनकल्याण प्रावि , महेन्द्र मावि जलथल , लिटल फ्लावर्स इङ्गिलस स्कुल हुँदै दुर्गा मावि गरामनीमा सात वर्ष सहायक प्रधानाध्यापक र ४ वर्ष प्रधानाध्यापक ( २०५३ सालसम्म) चलाएका थिए । गुणस्तरीय शिक्षा प्रदान गर्ने उद्धेश्यले २०५३ सालमा अन्य ६ जनासहित विराट ज्योति इङ्गिलस हाइस्कुल स्थापना गरी २०६५ चैतसम्म संस्थापक प्रिन्सिपलको रुपमा पदीय दायित्व निर्वाह गरेका थिए ।
त्यसपछि २०६५ बैशाख महिनाबाट एकल स्वामित्वमा कन्चनजंघा अंग्रेजी हाइस्कुल स्थापना गरी संस्थापक प्रिन्सिपल भई शैक्षिक क्षेत्रमा अतुलनीय योगदान दिएका छन् । उनले मनकामना कलेज बिर्तामोड र बिर्ता उच्च मावि बिर्तामोडमा समेत अध्यापन गरेका थिए । २०६२ सालमा राष्ट्रिय शिक्षा पदकबाट सम्मानित भएका उनी प्याव्सन झापामा आवद्ध भई प्याव्सन झापाको सचिव बनेका थिए । उनले जिल्लाका विभिन्न विद्यालयमा छात्रवृतिका अक्षय कोष स्थापना गरिदिएका थिए ।
यसैबीच प्याब्सन झापाले शिक्षासेवी न्यौपानेको निधनप्रति दुःख व्यक्त गरेको छ ।
प्याब्सनका पूर्व केन्द्रीय सदस्य तथा प्याब्सन झापाका प्राज्ञिक सल्लाहकारसमेत रहेका न्यौपानेको निधनप्रति दुःख व्यक्त गर्दै भावपूर्ण श्रद्धाञ्जली अर्पण गरेको हो ।
प्याव्सन झापाका सचिव लक्ष्मीप्रसाद उप्रेतीले शोक विज्ञप्ति जारी गर्दै स्व. न्यौपानेको आत्माको चीर शान्तिको कामनासहित शोकालुल परिवारमा गहिरो समवेदना व्यक्त गरेका छन् । न्यौपानेको पार्थिव शरीरमा प्याब्सन झापाको झण्डा ओढाई माल्यार्पणसहित श्रद्धाञ्जली अर्पण गरेको प्याब्सन झापाका सचिव उप्रेतीले जानकारी दिए ।
यसैबीच शिक्षासेवी न्यौपानेको निधनलाई लिएर बिर्तामोडका सम्पूर्ण विद्यालयहरुमा आज शोक विदा दिइएको थियो ।नगर शिक्षा समितिका निवर्तमान सदस्य तथा कंचनजंघा अंग्रेजी माविका संस्थापक प्राचार्य न्यौपानेले शिक्षा क्षेत्रमा सक्रिय योगदान पुर्याएकाले नगरभरिका सम्पूर्ण सामुदायिक , संस्थागत , धार्मिक तथा पूर्व प्राथमिक विद्यालयहरुलाई शोक विदा दिइएको नगर शिक्षा अधिकारी तिलचन भण्डारीले सूचना जारी गरी जनाएका छन् । शिक्षासेवी न्यौपानेको आजै कन्काई माईमा अन्त्येष्टि गरिएको छ । उनको अन्त्येष्टिमा सयौको सहभागिता रहेको थियो ।
