झापा,भदौ ४ । नेपालमा चिकित्सा पेसामा आकर्षण हुन छाडेको छ ।
न्यून तलब सुविधा, असुरक्षा, पढेको शुल्क उठ्न कठिन, रोजगार पाउन मुस्किल जस्ता समस्याले गर्दा चिकित्सा पेसामा आकर्षण हुन छाडेको हो ।
त्यति मात्र होइन, राम्रो सेवासुविधा भएका सरकारी अस्पतालमा कार्यरत चिकित्सकसमेत नेपालमा भविष्य नदेखेपछि युरोप, अमेरिका, अस्ट्रेलिया, बेलायत जस्ता देशमा पलायन हुन थालेका छन् । चिकित्सकलाई टिकाइराख्न सरकारसँंग ठोस कार्ययोजना भने छैन । ३२ वर्षअघि ओएनएम भएको जनशक्तिले अहिलेसम्म स्वास्थ्य क्षेत्र टिकिरहेको छ । हालसम्म पनि ३२ वर्षअघिको दरबन्दी कायम छ । दरबन्दी नथपिँदा पनि चिकित्सक पलायनको बाटो रोज्न बाध्य छन् ।
नेपाल मेडिकल काउन्सिलका अनुसार विदेश जानका लागि गुड स्ट्यान्डिङ प्रमाणपत्र लिनेमा दुई हजार ६८१ जना छन् । तीमध्ये युके ५५०, अमेरिका ५८७, माल्दिभ्स ३८४, युएई २०५, अस्ट्रेलिया २५३, भारत १९२, क्यानडा ३८, जर्मनी १६, कतार १०, सिङ्गापुर नौ, डेनमार्क ३३, हङकङ ११, आयरल्यान्ड छ, साउदी तीन, ओमान ३६, अन्य राष्ट्रमा ५७ जना छन् । यो तथ्याङ्कले पनि नेपालबाट चिकित्सक पलायन भइरहेको देखाएको छ ।
स्वास्थ्य तथा जनसंख्या मन्त्रालयका सचिव डा. विकास देवकोटाले चिकित्सकको पलायन रोक्नलाई सेवासुविधा बढाउनुपर्ने बताए । नेपाल चिकित्सक सङ्घका अध्यक्ष अनिलविक्रम कार्कीले नेपालमा अत्यन्त न्यून सेवासुविधाका कारण चिकित्सक पलायन हुने क्रम बढेको बताएका छन् ।
