बिर्तामोड , भदौ ४ । तीज पर्वको अवसर पारेर जिल्ला सहकारी संघ झापाले महिला सहकारीकर्मीहरुलाई उत्प्रेरणा प्रदान गरेको छ ।
महिला सहकारीकर्मीहरुकै अगुवाईमा जिल्ला सहकारी संघअन्तर्गत महिला उपसमितिको आयोजनामा बुधवार बिर्तामोडमा उत्प्रेरणामूलक कार्यक्रम सम्पन्न भएको हो । जिल्लाभरिका सहकारीबाट प्रतिनिधित्व गर्दै भेला भएका महिला सहकारीकर्मीहरु सहकारी संघको त्यस कार्यक्रमप्रति उत्साहित देखिन्थे ।
संघकी उपाध्यक्ष तथा महिला उपसमिति संयोजक देवी निरौला बस्नेतको अध्यक्षतामा भएको कार्यक्रममा बिर्तामोड नगरपालिकाका प्रमुख पवित्रा महतारा प्रसाईको प्रमुख आतिथ्य रहेको थियो । कार्यक्रममा नगर प्रमुख प्रसाई र नेपाल जेसीजका राष्ट्रिय प्रशिक्षक रश्मी शिल्पकारले महिला हक अधिकारका बारेमा प्रकाश पार्दै भात भान्सामा मात्र सीमित बस्न नहुने बताएका थिए । पुरुष प्रधान समाज भएर होला दिनभर सँगसँगै काम गरेका श्रीमान श्रीमती घर पुगेपछि श्रीमतीले छोराछोरी सासू ससुरा र भात भान्सा गर्नुपर्ने तर श्रीमान चाहिँ यत्तिकै बसिरहेको देख्दा समानता कागजमा मात्रै सीमित रहेको हो कि भनेर सोच्न बाध्य बनाएको नगर प्रमुख प्रसाईले बताइन् । नेपाल जेसीजका राष्ट्रिय प्रशिक्षक शिल्पकारले प्रमुख प्रशिक्षकको रुपमा उत्प्रेरणामूलक सहजीकरण गरेकी थिइन् ।
कार्यक्रममा संस्थाका सचिव भवानीप्रसाद दंगालले कार्यक्रमको औचित्यमाथि प्रकाश पार्दै जिल्ला सहकारी संघको वर्तमान अवस्थाका बारेमा जानकारी दिएका थिए ।
उनका अनुसार झापामा ७५६ वटा सहकारी संस्थाहरू क्रियाशील रहेको र तीमध्ये ४९३ वटा संस्था जिल्ला संघमा आबद्ध रहेका छन् । उनले समस्यामा परेका संस्थाहरूको संख्या २८ वटा रहेको र तीमध्ये ६ वटाको समस्या समाधान भइसकेको बताए । २८ वटामध्ये २४ वटा प्रदेश सहकारी रजिस्ट्रार कार्यालयको नियमन क्षेत्रभित्र र चारवटा पालिकाको नियमन क्षेत्रभित्रका सहकारीहरू रहेको सचिव दंगालको भनाइ छ ।
जिल्ला सहकारी संघका सदस्य देवीकुमारी अधिकारीले सञ्चालन गरेकोे कार्यक्रममा अर्का सञ्चालक सदस्य नीलाकुमारी दाहालले स्वागत मन्तव्य राखेकी थिइन् ।
