झापा, भदौ ४ । राष्ट्रिय प्रजातन्त्र पार्टीका अध्यक्ष राजेन्द्रप्रसाद लिङ्देनले देश बर्बाद पार्ने काममा कांग्रेस र एमाले बराबर जिम्मेवार भएको आरोप लगाएका छन् । उनीहरुकै कारण आज देश पूर्णरुपमा बेरोजगार उत्पादन गर्ने कारखाना र भ्रष्टाचारीहरूले कमाई खाने मैदानमा परिणत भएको उनको गंभीर आरोप रहेको छ ।
झापाको भद्रपुरमा बुधवार आयोजित राप्रपा झापा क्षेत्र नम्बर ३ को क्षेत्रीय अधिवेशन घोषणा सभालाई सम्बोधन गर्दै पार्टी अध्यक्ष लिङ्देनले ती राजनीतिक दलहरुकै कारण परिवार चलाउन छोराछोरी बेचिनु परिरहेको बताए ।
सरकारले देशमै सय जनालाई रोजगारी दिने एउटा पनि उद्योगधन्दा स्थापना गर्न नसकेको बताउँदै लिङ्देनले भने, ‘देशभित्र तपाई , तपाईको छोराछोरी र युवाहरूले गरीखाने वातावरण सृजना हुन सके कि सकेन त्यो महत्वपूर्ण कुरा हो ।’
‘नेपाली काँग्रेस र नेकपा एमालेले मिलेर चलाएको देशको हालत हेर्नुहोस् त ! ’ अध्यक्ष लिङ्देनले भने, ‘ देश लुट्ने बेलामा यिनीहरू एकै ठाउँमा उभिन्छन् ।’ आज मन्त्रीहरूको बीचमा छिटो कमाउनेमा प्रतिस्पर्धा चलिरहेको दावी गर्दै उनले भने, ‘कसले छिटो कमाउने, कसले धेरै कमाउने ।’
यो देश बनाउन काँग्रेस र कम्युनिस्टको विकल्पमा उभिने बेला आएको उनले बताए । ‘त्यो शक्ति भनेको राप्रपा मात्रै हो,’ उनले भने,‘ काँग्रेस, एमाले र माओवादी पार्टीविरुद्ध भन्दा पनि पार्टीको नाममा देशमा जुन लुटतन्त्र मच्चिरहेको छ त्यसको विरुद्धमा हामी उभिएका छौँ ।’
राप्रपाका कार्यवाहक क्षेत्रीय अध्यक्ष तुलसा आचार्यको अध्यक्षतामा भएको सभामा पार्टी सह–महामन्त्री भारतेन्दुकुमार मल्लिक, केन्द्रीय सदस्यहरू खुश्वु ओली, इनु अधिकारी, अञ्जार आलमलगायतले शुभकामना मन्तव्य राखेका थिए ।
यसैबीच सो अधिवेशनले क्षेत्रीय अध्यक्षमा रविचन्द्र ओझालाई निर्विरोध चयन गरेको छ । अधिवेशनले ओझाको नेतृत्वमा २२ सदस्यीय नयाँ कार्यसमिति गठन गरेको हो । समितिको उपाध्यक्षहरूमा खिवराज भट्टराई, तुलसा आचार्य र वीरबहादुर सिंह राजवंशी रहेका छन् । त्यस्तै सचिवमा हेमराज खनाल, कोषाध्यक्षमा पुनम लिम्बू , सहसचिव शिवलाल गिरी र जयप्रसाद तिम्सिना चयन भएका छन् ।
त्यसैगरी सदस्यहरूमा सुरेन्द्र बाह्रकोटी, बमबहादुर कन्दङ्वा, सरोजकुमार राई, चक्रप्रसाद ढकाल, पिंकी पौडेल, राधिका भट्टराई, अमृता बोगटी, तेजबहादुर चोङवाङ, केसमुदीन हक, भरतलाल राजवंशी, शिवकुमार भण्डारी, अर्जुनबहादुर विष्ट छेत्री, सङ्गीता थापा मगर र सोम तामाङ रहेका छन् । निर्वाचित पदाधिकारीहरूलाई राप्रपा अध्यक्ष लिङदेनले अबिर लगाइदिएर शुभकामना दिएका थिए ।
