झापा, भदौ ५ । नेपालको चर्चित गायन रियालिटी शो सारेगमप लिटल च्याम्प्स सिजन २ को टप ८ मा पर्न सफल बिर्तामोड ५ का संस्कार सापकोटालाई जिताउन अभियान संचालन गरिएको छ ।
व्यवसायी भरत सापकोटा र रत्नाकुमारी ओझा सापकोटाका छोरा संस्कारलाई जिताउन विभिन्न संघ संस्था , उद्योगी व्यवसायी , शुभेच्छुक , सर्वसाधारण लागिपरेका हुन् । हिजो बिर्तामोड उद्योग वाणिज्य संघको सभाहलमा आयोजित पत्रकार सम्मेलनमा सबैको सहयोगले ३५ हजार प्रतिष्पर्धीलाई उछिन्दै संस्कार टप ८ मा पुग्न सफल भएको बताउँदै अझ धेरै सहयोग गरेर उनलाई उपाधि विजेता बनाउन आव्हान गरिएको छ । संस्कारका पिता भरत सापकोटा र माता रत्नाकुमारी ओझा सापकोटाले आफ्ना छोरालाई विजयी गराउन भोटको आवश्यक रहेकाले अत्यधिक भोट गरिदिन आग्रह गरेका छन् ।
बिर्तामोडस्थित सप्तक संगीतालयमा संगीत सिकेका संस्कार बिर्तामोडस्थित न्यूटन्स एजुकेशन एकाडेमीमा कक्षा ८ मा अध्ययनरत छन् । उनी पहिलो न्यूटन्स आइडल बनेका थिए भने बिर्तामोड नगर स्तरीय तबला प्रतियोगितामा विजेता बनेका थिए । सानैदेखि तबला बजाउँदै आएका संस्कारमा संभावना देखेर गायनमा प्रवेश गराएको सप्तक संगीतालयका संस्थापक तथा न्यूटन्स एजुकेशन एकाडेमीका संगीत शिक्षक कुशल पौडेलले बताए । उनले सबैजना मिलेर संस्कारलाई उपाधिसम्म पुर्याउन आग्रह गरेका छन् । संस्कारलाई भोट गर्न बिर्तामोड उद्योग वाणिज्य संघका अध्यक्ष राजु न्यौपानेले पनि सबै व्यवसायीहरुलाई आग्रह गरेका छन् ।
उनलाई नेपालभित्र रहनेले खल्ती एपमार्फत khalti by IME मार्फत भोट गर्न सकिने छ भने नेपाल बाहिर रहनेहरुले khalti.com वेवसाइडमार्फत गर्न सकिने साथै आर्थिक सहयोग गरेर पनि उनलाई भोट गर्न सकिने संस्कारकी आमा रत्नाकुमारीले बताइन् । संस्कारलाई अहिलेसम्म न्यूटन्स स्कूल, प्रणामी समुदाय, मारवाडी समुदाय, व्यवसायी, लगायतको साथ रहेको बताइएको छ ।
कार्यक्रममा विभिन्न धार्मिक तथा सामाजिक व्यक्तित्वहरुको सहभागिता रहेको थियो । कार्यक्रमको संचालन सप्तक संगीतालयकी सञ्चालक आकृति खतिवडाले गरेकी थिइन् ।
