झापा, भदौ ५ । दुई साताअघि झापाको कन्काईमा ग्यास लिक भएर भएको आगलागीमा परी घाइते भएकी वृद्धाको मृत्यु भएको छ ।
आज बिहान ८१ वर्षीया बाटुलीमाया दाहालको घरैमा मृत्यु भएको हो । बिर्तामोडको चारपानेस्थित छोराको घरमा राखिएकोमा अवस्थामा उनको मृत्यु भएको बताइएको छ । प्रहरी टोली घटनास्थल गएको इलाका प्रहरी कार्यालय बिर्तामोडले जनाएको छ ।
गत साउन २२ गते बिहान अन्दाजी ७ः१५ बजे ताप्लेजुङ घर भई कन्काई वडा नम्बर ३ सुरुङ्गा बस्ने ध्रुव श्रेष्ठको तीनतले घरको दोस्रो तलामा एउटा कोठामा डेरा गरी बस्दै आएकी दाहालले खाना पकाउने क्रममा अचानक ग्यास सिलिण्डर लिक भई आगलागी भएको थियो ।आगलागीबाट उनको शरीरको बिभिन्न भाग डढेको थियो ।
उनलाई कनकाई नगर अस्पताल सुरुङ्गामा सामान्य उपचारपश्चात् थप उपचारको लागि काठमाण्डौ लगिएको थियो । त्यहाँ उपचार गराएर उनलाई घर ल्याइएको थियो ।
