बिर्तामोड, भदौ ६ । करोडौको लगानी खेर फाल्दै झाडीले छोपिएर जीर्ण बनेको बिर्तामोड–७ स्थित सहिद नेत्रपार्क यतिबेला रमणीयस्थल बनेको छ । पार्कभित्रको स्वीमिङ पुलले त झन् सवैको मन नै लोभ्याएको छ ।
सुन्दर निचाझोडा गोलधाप सामुदायिक वन क्षेत्रभित्रको सो स्वीमिङ पुलको कोशी प्रदेश सरकारका खानेपानी , सिँचाइ तथा ऊर्जा मन्त्री एकराज कार्कीले आज उद्घाटन गरेका छन् । करिव २० वर्षसम्म सुन्दर निचाझोडा गोलधाप सामुदायिक वन उपभोक्ता समितिको अध्यक्ष चलाएका मन्त्री कार्कीले नेत्रपार्कको विकासको लागि सक्दो सहयोग गर्ने प्रतिवद्धता जनाए । यस वर्ष प्रदेश सरकारबाट ५ लाख रुपैयाँ विनियोजन गराउन पहल गरेका मन्त्री कार्कीले आगामी वर्ष देउनिया खोलामा पुल निर्माण गरिदिने आश्वासनसमेत दिएका छन् ।
वन उपभोक्ता समितिका अध्यक्ष कृष्णप्रसाद लिम्बूको अध्यक्षतामा भएको कार्यक्रममा विशेष अतिथि वडाध्यक्ष अविरल कृष्ण खरेलले वनमा नयाँ समिति निर्वाचित भएपछि नेत्रपार्कमा श्रमदानमार्फत उपभोक्तालाई जोड्दै नयाँ स्वरुप दिन सफल भएकोमा खुशी व्यक्त गरे । कार्यक्रममा वन उपभोक्ता समितिकी पूर्व अध्यक्ष रेनुका उप्रेती , नेकपा एमालेका देवराज कार्की , माओवादी केन्द्रका मोहन सुब्बा, राप्रपाका नवीन भट्टराई, देवेन्द्र खवास , चन्द्रमणि खरेल, डिल्ली ओलीलगायतको आतिथ्य रहेको थियो । मंगलसिंह साँवाले स्वागत मन्तव्य राखेको सो कार्यक्रम सचिव इन्दिरा अधिकारी बाँस्कोटाले सञ्चालन गरेकी थिइन् ।
भुटानी शरणार्थीहरु तेस्रो राष्ट्र पुनस्र्थापित भएपछि गोलधाप शरणार्थी शिविर खाली भएको थियो । त्यसपछि सुन्दर निचाझोडा सामुदायिक वनको सो खाली जग्गामा सहिद नेत्रपार्क निर्माण गरिएको थियो । विभिन्न संरचना निर्माणपछि सञ्चालन नै नभई नेत्रपार्क बेवारिसे अवस्थामा पुगेको थियो । नेत्रपार्कमा बोटिङका लागि पोखरी निर्माण गरिएको थियो । त्यस्तै स्वीमिङ पुलसहित चिल्ड्रेन पार्क निर्माण गरिएको थियो । पार्कभित्र डाइनोसरको प्रतिमा समेत राखिएको थियो । पोखरी पातपतिङ्गरले पुरिएको थियो भने स्वीमिङ पुल प्रयोगविहीन बनेको थियो । स्वीमिङ पुल र बालबालिका खेल्ने संरचनाहरु बिग्रिसकेका थिए भने डाइनोसर प्रयोग गर्नै नमिल्ने गरी भत्किसकेको थियो ।
नेत्रपार्कलाई संरक्षण गर्न गत वर्षदेखि श्रमदान अभियान संचालन गरिएको थियो । त्यसलाई लिम्बूको नेतृत्वको समितिले अझ तीब्रता दिएको हो ।करिव २७ विगाहमा फैलिएको सो पार्कमा ३ करोडको हाराहारीमा बजेट खेर फालेको देखिन्छ । तत्कालीन एमाले नेता नरेश खरेलको अध्यक्षतामा पार्क निर्माण समिति गठन गरी करोडौ बजेट ल्याइएको थियो । निर्माण समितिको उपाध्यक्षमा माओवादीका नेता सीपी कडरिया र सचिवमा खरेलका भतिज टिका खरेल रहेका थिए । पार्कमा पिकनिक स्थल, चिल्ड्रेन पार्क, स्वीमिङ पुल, चेन्जिङ रुम र शितल घरहरु निर्माण गरिएको थियो ।
उद्घाटन भएको स्वीमिङ पुलमा पौडी खेल्नका लागि वन उपभोक्ता समितिका सदस्यहरुलाई ५० रुपैयाँ र बाहिरका लागि सय रुपैयाँ रेट तोकिएको छ । स्वीमिङ पुलसंगै चेन्जिङ रुम , शौचालयजस्ता संरचनाहरुलाई उपयोगमा ल्याइएको छ । केही दिनपछि त्यहाँ रेस्टुरेन्ट संचालन गरिने जनाइएको छ ।
