झापा, भदौ ७ । पाँचथरको हिलिहाङ गाउँपालिका वडा नं. ७ हेवाखोलामा रहेको माउन्टेन हाइड्रोपावरमा कार्यरत एकजनाको करेन्ट लागेर मृत्यु भएको छ ।
हिजो दिउँसो ३ बजे हाइड्रोपावरको ग्राबेल ट्यापमा बेल्चाले बालुवा सफा गर्नेक्रममा ओखलढुंगा लिखु गाउँपालिका ६ घर भई सोही हाइड्रोपावरमा जेसीबी चालकको रुपमा कार्यरत ३० वर्षीय लोकेन्द्र बि.क.लाई अचानक करेन्ट लागेको थियो । करेन्ट लागेर उनको घटनास्थलमै मृत्यु भएको हो ।
प्रहरी चौकी जोरपोखरी पाँचथरमा जानकारी प्राप्त हुनसाथ प्रहरी टोली खटिएर घटनास्थल सुरक्षित राखेको थियो । थप अनुसन्धान तथा कानुनी प्रकृयाको लागि जिल्ला प्रहरी कार्यालय पाँचथरबाट प्रहरी टोली गएको छ ।
