झापा, भदौ ७ । झापामा एक सातामा करेन्ट लागेर तीनजनाको मृत्यु भएको छ ।
दुईजनाको करेन्ट लगाएर माछा मार्दा र एकजनाको पंखा मर्मत गर्ने क्रममा करेन्ट लागेर ज्यान गएको हो । लापरवाही र असावधानीका कारण झापामा धेरैजनाले करेन्टबाट ज्यान गुमाउनु परिरहेको हो ।
आज बिहान ८ः३० बजे कनकाई नगरपालिका वडा नं. १ स्थित खहरे खोलामा सोही ठाउँ बस्ने ३७ वर्षीय पंकज माझीले बिजुलीको पोलबाट करेन्ट लगाई माछा मार्ने क्रममा उनलाई करेन्ट लाग्दा घटनास्थलमै मृत्यु भएको हो । घटनाबारे जानकारी प्राप्त हुनासाथ थप अनुसन्धान तथा कानुनी प्रकृयाको लागि इलाका प्रहरी कार्यालय बिर्तामोडबाट प्रहरी टोली खटिएको छ ।
तीन दिनअघि झापामा करेन्ट लगाएर माछा मार्दा अर्का व्यक्तिले पनि अकालमै ज्यान गुमाएका थिए । गत बुधवार दिउँसो २ बजे कमल गाउँपालिका –३ खानेपानी टोल बस्ने २१ वर्षीय उज्वल राईले सोही ठाउँमा रहेको ढ्याङ्ग्री खोलामा करेन्ट लगाई माछा मार्ने क्रममा उनी आफैलाई करेन्ट लागेको थियो । घाइतेलाई उपचारको लागि लाईफलाईन अस्पताल दमकमा पुर्याउनासाथ डाक्टरले मृत घोषणा गरेका थिए ।
त्यस्तै भदौ २ गते मेचीनगर नगरपालिका ५ भेटघाट चौक बस्ने २२ वर्षीय संदिप राजवंशीले आफ्नै घरको टेवल पंखा बिग्रेर मर्मत गर्ने क्रममा अचानक करेन्ट लाग्दा उनको मृत्यु भएको थियो ।
भदौको एक साताभित्र करेन्ट लागेर तीनजनाले ज्यान गुमाउँदा गत साउन महिनामा पाँचजनाको मृत्यु भएको थियो । गत वर्ष झापामा करेन्ट लागेर १५ जनाको मृत्यु भएको थियो ।
