झापा, भदौ ८ । हिन्दु धर्मका संरक्षकहरुले बढ्दो धर्मान्तरणप्रति चिन्ता व्यक्त गरेका छन् । हिन्दु धर्म अहिले चुनौतीको रुपमा रहेकाले हिन्दुहरु जहाँसुकै भएपनि सुरक्षित र एकताबद्ध रहनु पर्नेमा उनीहरुको जोड रहेको छ ।
विश्व हिन्दू परिषद् तथा अर्जुनधारा जलेश्वर धामद्वारा संयुक्तरुपमा आज आयोजित “ धर्मो रक्षति रक्षितः” प्रवचनात्मक प्रबोधन कार्यक्रममा बोल्दै प्रमुख अतिथि विश्व हिन्दू परिषद्का अन्तर्राष्ट्रिय महामन्त्री मिलिन्द परान्डेजीले धर्मान्तरण रोक्न हरेक हिन्दू धर्मावलम्बीमा भावना जागृत गराउनु पर्ने बताए । महामन्त्री परान्डेजीले हरेक हिन्दुमा ‘म हिन्दु हुँ’ भन्ने भावना जागृत भएपछि मात्र धर्मान्तरण रोक्न सकिने बताए ।
हिन्दु धर्म अहिले चुनौतीको रुपमा रहेको बताउँदै उनले विश्वभरका हिन्दुहरुलाई संगठित गर्दै भेदभावरहित हिन्दु समाजको निर्माणमा लाग्नु पर्नेमा जोड दिए । हिन्दु धर्म नेपालको पहिचान र अस्तित्व भएकोले यस धर्मलाई सबै पक्षबाट जोगाउनु पर्ने भन्दै उनले नेपाल र भारतका हिन्दुहरुबीच सदियौँदेखि सुमधुर सम्बन्ध रहेको चर्चा गरे ।
अर्जुनधारा जलेश्वरधामका अध्यक्ष नवीन गट्टानीको अध्यक्षतामा भएको कार्यक्रमा विशिष्ट अतिथि विश्व हिन्दू परिषद्का केन्द्रीय सह–मन्त्री अरुण नेटके जी, जनजाति कल्याण आश्रमका महासचिव प्रेम थुलुङ , अर्जुनधारा जलेश्वरधामका मूल अर्चक तथा वैदिक सनातन धर्म संरक्षण समितिका उपाध्यक्ष अग्नि सिग्देललगायतका धार्मिक व्यक्तित्वहरुको उपस्थिति रहेको थियो ।
मूल अर्चक अग्नि सिग्देलले स्वागत गरेको कार्यक्रमको संचालन वैदिक सनातन धर्म संरक्षण समितिका महासचिव खगेन्द्रप्रसाद निरौलाले गरेका थिए । कार्यक्रममा करिब हजार जनाको उपस्थिति रहेको थियो ।
